Արքայազն Ուիլյամը հուզականորեն է արձագանքել իր եղբոր՝ արքայազն Հարիի ու նրա կնոջ՝ Մեգան Մարքլի պահվածքին: Ինչպես պարզվել է, նման արձագանքը հետևել է Սասեքսի դքսի և դքսուհու կողմից Եղիսաբեթ II-ին ուղղված վիրավորական և խայթող կշտամբանքներին:
Ըստ Sunday Times-ի, ամեն ինչ սկսվել է Բուքինգհեմյան պալատի փետրվարի 19-ին տարածած հայտարարությունից, որում նշվել է, որ Եղիսաբեթ II-ի որոշմամբ ԱՄՆ-ում բնակություն հաստատած արքայազն Հարին և նրա կինը վերջնականապես զրկվում են թագավորական բոլոր լիազորություններից, ինչպես նաև իրենց հովանավորության տակ գտնվող կազմակերպություններից:
Սասեքսի դուքսն ու դքսուհին անսպասելիորեն պատասխանել են թագուհուն: Նրանց հայտարարությունը Twitter-ում հրապարակել է Հարիի ու Մեգանի մասին գրքի հեղինակ Օմիդ Սկոբին: Նրանք հրապարակավ հերքել են Եղիսաբեթ II-ի խոսքերը, որ հնարավոր չէ ծառայել հասարակությանը՝ հրաժարվելով գահից: Նրանց խոսքով, Սասեքսի դքսի և դքսուհու գործունեությունն «ապացուցում է, որ նրանք հավատարիմ են իրենց պարտականությանը և շարունակում են ծառայել Մեծ Բրիտանիային և աշխարհին»: Այժմ նրանք պատրաստ են շարունակել իրենց ներկայացրած կազմակերպություններին աջակցությունը՝ «անկախ իրենց կարգավիճակից»:
Նման վիրավորական պահվածքը զայրացրել է թագուհուն: Պալատականներից մեկի խոսքով, Նորին Մեծությունը վստահ է, որ պետական ծառայությունն անհամատեղելի է արքայազն Հարիի և Մեգան Մարքլի ԱՄՆ-ում ծավալած կոմերցիոն գործունեության հետ:
Արքայազն Ուիլյամը նույնպես ցնցված է ու տխուր կատարվածից: Քեմբրիջի դուքսը դատապարտել է եղբորը՝ Օփրա Ուինֆրիին տված մեծ անկեղծ հարցազրույցի համար, որը կթողարկվի մարտի 7-ին:
