Եվրոպայի և Ռուսաստանի ժողովուրդներին մերձեցնելու լավագույն միջոցը ՌԴ-ի և ԵՄ-ի միջև այցագրային ռեժիմի պարզեցումն է: Այդ մասին հայտարարել է Ռուսաստանում Իտալիայի դեսպան Պասկուալե Տերաչանոն:
«Մենք պետք է ձգտենք առավելագույնս մերձեցնել Եվրոպայի և Ռուսաստանի ժողովուրդներին: Ես կարծում եմ, որ դրա լավագույն միջոցը ՌԴ-ից ԵՄ մուտքի համար այցագրային ռեժիմի դյուրացումն է, երիտասարդների համար այցագրեր ստանալու գործընթացի պարզեցումը»,- ասել է Տերաչանոն՝ հանդես գալով Բանկա Ինտենզայի և ՌԴ առևտրա-արդյունաբերական պալատի «Ռուսաստան և Եվրոպա. նոր մարտահրավերներ տնտեսական համագործակցության և համավարակի հաղթահարման համար» երկրորդ համատեղ սեմինարում: Նա հույս է հայտնել, որ Իտալիայի և ԵՄ-ի գործընկերները կհետևեն այդ ուղուն: Իտալիան տարիներ շարունակ հանդես է գալիս Ռուսաստանի հետ այցագրային ռեժիմի պարզեցման օգտին:
Նման բանակցություններ անցկացվել են, սակայն 2014 թվականին դադարեցվել են ՌԴ-ի և ԵՄ-ի հարաբերություններում առաջացած ճգնաժամի պատճառով: Ռուսաստանի և արևմտյան երկրների հետ հարաբերությունները սրվել են Ուկրաինայում և Ղրիմի շուրջ ստեղծված իրադրության պատճառով, որը Ռուսաստանի հետ վերամիավորվել է թերակղզում անցկացված հանրաքվեից հետո: Արևմուտքը, ՌԴ-ին մեղադրելով միջամտության մեջ, նրա դեմ պատժամիջոցներ է սահմանել։ Մոսկվան պատասխան միջոցներ է ձեռնարկել, ապրանքների ներմուծման փոխարինման կուրս վերցրել և քանիցս հայտարարել, որ իր հետ պատժամիջոցների լեզվով խոսելն արդյունավետ չէ, հաղորդել է ՌԻԱ Նովոստին:
