«Իշխանության համար գզվրտոց է գնում: Թող բացեն իրենց դեմքերը, հիմա մաքրվելու պահ է»,- այս մասին «Առաջին լրատվական»-ի հետ զրույցում ասաց քանդակագործ Վիգեն Ավետիսը՝ անդրադառնալով դիտարկմանը, որ վերջին օրերին ընդդիմադիր դաշտի առանցքային խաղացողները հանդես են գալիս հարցազրույցներով:
«30 տարվա ընթացքում սուտն ու ճիշտը խառնվել էին իրար, հիմա զատվում են՝ սուտը ճշտից, ճահիճը՝ մաքուր ջրից: Մենք՝ բոլորս գիտենք, թե նրանք ինչով էին զբաղվում, ինչով են զբաղվում և ինչի համար են կռիվ տալիս: Հաստատ կռիվ չեն տալիս պետության կայացման համար, կռիվ են տալիս ամեն մեկն իր շահերի համար: Եթե այս ձևաչափով չպայքարեն, պիտի բանտ նետվեն, բանտից ազատվելու ջղաձգումներ են տեղի ունենում»,- նշեց քանդակագործը՝ հավելելով, որ ավարտվել է թալանի ժամանակահատվածը և վախի մթնոլորտն այլևս չկա:
«Սերժ Սարգսյանը պետք է քննիչի հետ զրուցի, ոչ թե հարցազրույցներ տա, և պիտի պատասխան տա իր գործած հանցանքների՝ սպանության ու թալանի համար: Հիշո՞ւմ եք բանակն ինչ օրի էր գցել, Հոկտեմբերի 27-ի պատասխանատուներից մեկն էլ է նա, թող ավելի լավ է քննիչի ու դատախազի հետ իր հարցերը լուծի»,-ասաց Վիգեն Ավետիսը:
Անդրադառնալով Էդմոն Մարուքյանի արձագանքին՝ Սերժ Սարգսյանի հարցազրույցին, որ եթե որոշված էր՝ տարածքները պետք է հանձնվեին, ինչո՞ւ էին ներդրումներ կատարվում այնտեղ, Վիգեն Ավետիսը նշեց, որ Մարուքյանի ասածները լուրջ չի ընդունում. «Նա ոչ թե քաղաքական վերլուծություններ է անում, այլ «աչոկներ» է հավաքում: Ես կուզեի սրտացավ խոսք լսել, բայց այսօր շատ գործիչներ՝ այդ թվում՝ Մարուքյանը և ԲՀԿ-ի շատ անդամներ «աչոկներ» են հավաքում և ժողովրդին բզկտում են: Հիմա համախմբվելու պահն է: Աչոկ մի՛ հավաքեք, ինչ որ անում եք, սրտացավությամբ արեք, հիմա քաղաքական կարիերայի պահը չէ: Նույնը վերաբերում է ծերուկ ավազակին՝ Վազգեն Մանուկյանին: Ինչո՞ւ եք բզկտում առանց այն էլ վիրավոր Հայաստանի մարմինը: Սրտացավորեն լռե՛ք ուղղակի կամ շշուկով խորհուրդ տվեք իշխանությանը: Ես լրջություն եմ պահանջում և ոչ է թե «աչոկներ»:
Մանրամասն՝ տեսանյութում:
