Ռազմական փորձագետ Դավիթ Ջամալյանը, այսօր լրագրողների հետ հանդիպմանը անդրադառնալով այն խնդրին, որ ԼՂՀ հարցի կարգավորման գործում Բաքուն առաջարկում է, առանց շրջանակային համաձայնագրի ստորագրման, անցնել խաղաղ համաձայնագրի մշակմանը, ասաց. «Եթե ի մի բերենք դովիլյան հայտարարությունից մինչ հիմա եղած ընթացքը՝ պարզ է դառնում, որ Բաքվում որոշված մի մեթոդոլոգիա ձևավորել, որով հնարավոր կլինի տապալել գործընթացը, այսինքն՝ հաշտություն ձեռք բերելու փոխարեն գործ ունենք բանակցային գործընթացը տապալելու մեթոդոլոգիայի հետ»:
Թե ինչու է Բաքվին ձեռնտու հաշտություն ձեռք չբերելը՝ Ջամալյանի խոսքով, մեզ համար բավական մտահոգիչ է, քանի որ եթե մենք խոսում ենք արցախյան խնդրի կարգավորման մասին, այս դեպքում պետք ընդունենք, որ դիմացի կողմը չունի այդ մտադրությունը:
Դավիթ Ջամալյանը փաստեց, որ պաշտոնական Բաքուն դիվանագիտական սեթևեթանքի տակ գտել է մի ձև, որով հնարավոր է հետաձգել խնդրի կարգավորումը: Բանակցային գործընթացում իբրև Հայաստանի համար շահեկան երևույթ Ջամալյանը նշեց, որ գործընթացում Արցախի ձայնը դարձավ լսելի. «Արցախը հանդես եկավ իբրև առանձին սուբյեկտ, ինչը ավելի է մեծացնում հավանականությունը, որ լուծումը կլինի ի շահ մեզ»: