Գերմանիայի արտաքին գործերի նախարարությունը «persona non grata» է հայտարարել Բեռլինում ՌԴ դեսպանատան աշխատակիցներից մեկին:
ԳԴՀ ԱԳՆ-ի ներկայացուցչի խոսքով, սա Գերմանիայի կառավարության պատասխանն է Մոսկվայում ԳԴՀ դեսպանատան աշխատակցին և ԵՄ այլ երկրների դիվանագետներին արտաքսելու որոշմանը, հաղորդում է Deutsche Welle-ն:
Շվեդիայի արտգործնախարար Անն Լինդեն իր թվիթերում գրել է, որ ՌԴ դեսպանին տեղեկացրել են Շվեդիայից Ռուսաստանի դեսպանատան աշխատակիցներից մեկի արտաքսման մասին: «Դա հստակ պատասխան է շվեդ դիվանագետին արտաքսելու որոշմանը, որն ընդամենը կատարել է իր աշխատանքը»,- ասել է նախարարը:
Լեհաստանի ԱԳՆ-ն «persona non grata» է ճանաչել Պոզնանում ՌԴ գլխավոր հյուպատոսության աշխատակցին: Պետերբուրգում իր երկրի գլխավոր հյուպատոսության աշխատակցին արտաքսելու որոշումը գերատեսչությունն անհիմն է անվանել:
ՌԴ ԱԳՆ ներկայացուցիչ Մարիա Զախարովան «Ռոսիա 1» հեռուստաալիքի եթերում հայտարարել է, որ ԵՄ որոշ երկրների՝ Նավալնու աջակիցների և ԱՄՆ-ի ու Մեծ Բրիտանիայի ներկայացուցիչների մասնակցությամբ տեսահամաժողով կազմակերպելու ծրագրերը «Ռուսաստանի վրա հարձակման անօրինական դրսևորում են»:
