Ալեքսանդր Սպենդիարյանի անվան օպերայի և բալետի ազգային ակադեմիական թատրոնում շաբաթ օրը կայացավ «Ուժեղ Հայաստան Ռուսաստանի հետ. հանուն նոր միության» շարժման հիմնադիր համագումարը։
Համագումարի մասնակիցները տարիներ շարունակ աչքի են ընկել իրենց պրոռուսական հայացքներով ու գործունեությամբ՝ Հայկ Բաբուխանյան, Տիգրան Ուրիխանյան, Վահան Բաբայան, Հրանտ Բագրատյան, Արամ Գասպարի Սարգսյան, Վարդան Բոստանջյան։ Բայց հետպատերազմական այս փուլում նման նախաձեռնությամբ հանդես գալը և բացահայտ Հայաստանը Ռուսաստանի կազմի մեջ մտցնելու քարոզը գերազանցում են բոլորիս պատկերացումները։
Քաղաքագետ Լևոն Շիրինյանի կարծիքով՝ Հայաստանը պատերազմից հետո անընդհատ փորձում են ապակայունացնող գործընթացի մեջ ներքաշել: «Պատերազմի արդյունքը պարզ է։ Բայց ի՞նչ արեցին հետո, վարչապետին փորձեցին հեռացնել հանրահավաքներով և այլն, բայց այդ ամենը վերածվեց մարգինալ գործունեության։ Սփյուռքում էլ, բացի վնասից, ոչ մի հաջողություն չեղավ, վերջին փամփուշտներն են կրակում։ Հետո տեղի ունեցավ նախկին նախագահների հանդիպումը։ Հիմա սա հերթական ապակայունացման փորձն է»,- «Առաջին լրատվական»-ի հետ զրույցում ասաց նա։
Ըստ Շիրինյանի՝ վտանգը մշտապես առկա է, դրա համար իշխանությունը պետք է աշխատի սահմանադրականության ու ժողովրդավարության շրջանակներում: «Պետք է կիրառվեն օրենքները։ Մենք Անկախության հռչակագիր ունենք, ո՞վ իրավունք ունի օտար պետության դրոշով այստեղ միտինգ անելու։ Սա իշխանության թուլության արդյունքն է»,- եզրափակեց նա։
Գերագույն խորհրդի պատգամավոր Ազատ Արշակյանի կարծիքով՝ Հայաստանը դատապարտված է համագործակցել Վրաստանի, Ուկրաինայի, ռուսական պետության հետ: «Դա աշխարհագրորեն անհրաժեշտ պայման է։ Աշխարհագրությունը մեզ թելադրում է լինել գործընկեր այդ պետությունների հետ։ Բայց շեշտում եմ՝ գործընկեր։ Իսկ մենք, մեղմ ասած, գործընկեր չենք Վրաստանի ու Ուկրաինայի հետ։ Գործընկեր չենք նաև Ռուսաստանի հետ։ Եթե Վրաստանի ու Ուկրաինայի հետ մենք գործընկեր չենք, որովհետև չենք ճանաչում մեր շահերը, մեր իշխանությունը չի պաշտպանում մեր երկրի շահերը, ապա Ռուսաստանի հետ հարաբերություններում մեր իշխանությունները մեզ չեն էլ հարցնում։ Ռուսաստանն ուղղակի իշխում է, Հայաստանին գործընկեր չի ճանաչում, այլ պարզապես որպես սնուցող միջավայր, անվտանգության գոտի, ֆորպոստ, թնդանոթի միս։ Գործընկերություն պետք է հաստատել, բայց այն, ինչ ես թվարկեցի՝ Հայաստանին միայն վնաս է»,- «Առաջին լրատվական»-ի հետ զրույցում ասաց նա:
Արշակյանի դիտարկմամբ՝ Ռուսաստանի կամ որևէ այլ պետության համար մանրադրամ լինելն անթույլատրելի է. «Բայց հիմա մեր հարաբերությունները հենց այդպիսին են»։
Խոսելով վերը նշված գործիչների նախաձեռնության մասին՝ մեր զրուցակիցն ասաց. «Նրանք պարարտացնում են թնդանոթի միսը, անվտանգության տարածքը։ Նրանք այդ երկրների շահերի ներկայացուցիչներն են։ Մի մասը քաղաքական իդիոտներ են։ Բաժանում եմ երկու մասի՝ կա՛մ վարձու, գումարով վաճառվողներ են, այսինքն՝ իրենց կարծիքը վաճառում են որոշակի գումարի դիմաց։ Ու կան նաև քաղաքական իդիոտներ, որոնք իրենց շահերը չեն ճանաչում»,- եզրափակեց Արշակյանը։
Լուսանկարը՝ panorama.am-ի
