«17+»-ը կարծես թե վերջին օրերն է ապրում: Վերջակետը դրեց Ռոբերտ Քոչարյանը՝ հայտարարերելով, որ մասնակցելու է խորհրդարանական ընտրություններին և «կրելու» է:
«Առաջին լրատվական»-ի հետ զրույցում անդրադառնալով այս դիտարկմանը՝ Հանրային խորհրդի նախագահ Ստեփան Սաֆարյանը նշեց. «Տեսնում ենք «17+ »-ի ճգնաժամը, այժմ ավելի քիչ ուժեր են դրա մաս կազմում: Տեսանելի է նաև, որ առնվազն երկու հարց քննարկվում է՝ շարունակել թե չշարունակել Վազգեն Մանուկյանի գլխավրությամբ, և արդյո՞ք շարունակել այն մարտավարությամբ, որը որդեգրել էին՝ սկսած նոյեմբերի 10-ից:
Ինչու առաջացավ առաջնորդի խնդիրը. վերջին շրջանում մարզեր կատարած նրանց այցերը ցույց տվեցին, որ ավելի շատ սկանդալներն էին քննարկվում, քան այն, ինչ այնտեղ նրանք ասում էին: Բացի դրանից՝ նրանց ասելիքը նույնական չդարձավ հասարակության զգալի հատվածի պատկերացումների հետ: Ռ. Քոչարյանի հայտարարությամբ պարզորոշ է դառնում, որ պրոցեսը հետագայում անձամբ ինքն է գլխավորելու»:
«Սրան գումարվեցին նաև մի քանի այլ ազդակներ: Նոյեմբերի 10-ի ներխուժումից, բռնություններից հետո փորձեցին պատճենել 2018-ին կիրառված տեխնոլոգիաները, կիրառել քաղաքացիական անհնազանդության մեթոդը: «17+»-ը խնդիր ուներ այն ժամանակվանից, երբ ընտրեց դատավորի կարգավիճակը և վարչապետին սկսեց ներկայացնել որպես պատերազմի թիվ մեկ պատասխանատու, և դա հակադրության մեջ էր հանրության պատկերացումների հետ, որովհետև հանրությունը ամենևին այս պատերազմը չի համարում մեկ անձի պարտության պատմություն: Հասարակության գնահատականները նույնական չեն եղել 17-ի որակումներին, որոնք փնտրում էին մեկ դավաճանի:
Բացի դրանից՝ այս ձևաչափում ներգրավված են երկու նախկին նախագահները, և դավաճանների ու մեղավորների փնտրտուքում հասարակությունը չի կարող անտեսել այս ձևաչափում ներգրավված ուժերի պատասխանատվության բաժինը: «17+»-ի և հասարակության կոնտակտը ի սկզբանե դատապարտված էր ձախողման»,- ասաց Հանրային խորհրդի նախագահը:
Ստեփան Սաֆարյանը նաև ընդգծեց, որ «17»-ն իր գրավչությունը և վստահությունը կորցրել է նաև Մոսկվայի մոտ, և կարծիք հայտնեց, որ Քոչարյանի ճամփորդությունը Ռուսաստան դրա շուրջ է. «Քոչարյանը պիտի համոզի պայքարը շարունակել իր գլխավորությամբ և վստահեցնի, որ «կրելու է, և ռուսահաճո հայտարարություններով փորձի ստանալ աջակցություն»:
Մանրամասն՝ տեսանյութում:
