Ի՞նչն է նորաձև, ի՞նչ գույների ու երանգների հագուստ է ցանկալի կրել այս սեզոնում՝ փորձել է պարզել «Առաջին լրատվականը»՝ զրուցելով «Ատեքս» նորաձևության կենտրոնի տնօրեն Կարինե Դնոյանի հետ:
Կ.Դնոյանի խոսքով՝ այս սեզոնին նորաձև են համարվում վառ գույները, որոնք հնարավոր է համադրել իրար հետ:
«Հիմնականում նորաձև են համարվում վառ գույները՝ դեղին, փիրուզագույն, նարնջագույն, նորաձև է հիպիական կամ գնչուական ոճը, մյուս ուղղությունն ամբողջովին սպիտակ գույնն է», – ասաց նա՝ ավելացնելով, որ կարելի է կրել ամբողջությամբ սպիտակ շրջազգեստ՝ պիջակով:
Մասնագետը խորհուրդ տվեց երեկոյան միջոցառումներին կրել ժանյակե հագուստներ: Ինչ վերաբերում է այդքան չարչրկված սև գույնին, ապա վերջինս նշեց, որ սև գույնի հագուստ արդեն հազվադեպ են կրում անգամ կոկտեյլների ժամանակ:
«Նորաձև են և՛ սաֆարի ոճը, և՛ պրինտերը՝ դաջվածքներով ծաղկավոր կտորները, որոնք հնարավոր է արդեն տեսնել Երևանի փողոցներում»,- նշեց Կ.Դնոյանը:
Խոսելով այս տարվա տրենդներից՝ նա տեղեկացրեց, որ մոդայիկ են վառ համադրությունները, սակայն այլ բան է վառ գույնը, այլ բան, երբ դա համադրում են փայլի, նախշերի հետ:
Ինչ վերաբերում է հագուստի ընտրության պարագայում մարդու ֆինանսական վիճակին, ապա նա չանտեսեց այդ հանգամանքը, քանի որ հենց էժան խանութներից են մարդիկ ձեռք բերում չինական, իրանական ու թուրքական անորակ հագուստ:
Այն հարցին, թե ի՞նչ ոճի հագուստներ են նախընտրում կրել հայերը՝ եվրոպակա՞ն, թե՞ ասիական, Կ. Դնոյանը ասաց, որ դժվար է միանշանակ պատասխանել, քանի որ տարբեր խավի մարդիկ տարբեր ոճերի հագուստ են նախընտրում:
«Մարդ որքան ավելի զարգացած է, օժտված մտավոր կարողություններով, այնքան ավելի շատ է նախընտրում կրել եվրոպական ոճի հագուստ, երիտասարդությունը կրում է ամերիկյան, իսկ այն մարդիկ, ովքեր եկել են շրջաններից, նախընտրում են ասիական ոճը»,- ասաց նա՝ նշելով, որ հիմա այդ տարբերությունն ավելի շատ է երևում:
