«17 ուժերի ձևաչափը սպառվում է: Նրանց անհաջողությունների շղթան պարտադրում է բռնության ճանապարհով հասնելու քաղաքական նպատակին կամ առաջադրված խնդրի լուծմանը: Եվ տեսնում ենք, որ նրանց կողմից ավելի բաց բռնության կոչեր են հնչում»,- այս մասին «Առաջին լրատվական»-ի հետ զրույցում ասաց քաղաքագետ Էմիլ Օրդուխանյան՝ անդրադառնալով Վազգեն Մանուկյանի հայտարարությանը, որ եթե Փաշինյանը սահմանադրական ճանապարհով չհեռանա, կդիմեն ապստամբության, և դիտարկմանը, որ շատերի կարծիքով՝ սա զինված ապստամբության համատեքստում պետք է դիտարկել:
«Երբ Վազգեն Մանուկյանը հայտարարեց, որ շենքեր կգրավեն, գործողությունների կդիմեն, բայց առանց բռնության, այստեղ տրամաբանական հակասություն կա, որովհետև շենքեր գրավել կամ պաշտոնատար անձանց նկատմամբ գործողություններ իրականացնելը առանց բռնության հնարավոր չէ: Սրանով նա անձնապես իրեն պահովագրելու և մյուսներին գործողությունների դրդելու նպատակ է հետապնդում»,- նշեց քաղաքագետը՝ հավելելով, որ հետպատերազմական իրավիճակում ապակայունացնելու և ցնցումների տանելու այս սպառնալիքը բացասաբար կարող է անդրադառնալ մեր պետականության վրա:
Խոսելով Հայաստանի Հանրապետության արտաքին քաղաքականության մասին՝ Օրդուխանյանը նկատեց, որ բարդագույն իրավիճակ է ստեղծվել, բայց դա կարող է ստիպել՝ գտնել արդյունավետ ելքեր: Նրա կարծիքով՝ Ֆրանսիան ձեռք է մեկնում, բայց Հայաստանը չի շտապում սեղմել մեկնած ձեռքը և բալանսավորել իր արտաքին քաղաքականությունը: «Հենվելով միայն Ռուսաստանի Դաշնության վրա՝ Հայաստանը կորցնում է մանևրելու շանսը»,- ընդգծեց քաղաքագետը՝ հավելելով, որ անհրաժեշտ է ճկունություն ցուցաբերել:
Մանրամասները՝ տեսանյութում: