Մեր զինվորականությունը չի ներքաշվի քաղաքական պայքարի մեջ և կմնա հավատարիմ սահմանադրական սկզբունքներին հետևելու իր կեցվածքին: «Առաջին լրատվական»-ի հետ զրույցում այս մասին ասաց քաղաքագետ Վիգեն Խաչատրյանը՝ անդրադառնալով դիտարկմանը, որ Բանակի օրվան ընդառաջ նախատեսվում է հանրահավաք, և փորձագիտական շրջանում կարծիք կա, թե ընդդիմադիրները նպատակ ունեն մոբիլիզացնել զինվորականությանը և ներքաշել քաղաքականության մեջ:
«Այժմյան Հայաստանում հռչակված է ժողովրդավարական սկզբունքների կյանքի կոչման ծրագիր, և այդ առումով ցանկացած ոք իրավունք ունի արտահայտել իր կարծիքը, օրինական հավաքներ անցկացնել, ես դրանում որևէ արտառոց բան չեմ տեսնում»,- անդրադառնալով խորացող ներքաղաքական ճգնաժամին և ընդդիմության հանրահավաքներին՝ նշեց Վիգեն Խաչատրյանը՝ ընդգծելով, որ այլ խնդիր է, թե հանրահավաքների մասնակիցներն ու նախաձեռնողներն ինչ նպատակ են հետապնդում:
«Տպավորություն է, թե «17+»-ն իր վերջին օրերն է ապրում, այնտեղից դուրս եկողները հարցազրույցներ տվեցին՝ նշելով, որ հասկացել են, թե ինչ հեռահար նպատակներ ունեն և ովքեր են այդ շարժումը ղեկավարողները, խոսքը Ռոբերտ Քոչարյանի և Սերժ Սարգսյանի մասին է: Անդրադառնալով այս դիտարկմանը՝ Խաչատրյանը նշեց. «Հայաստանում տարիներով արմատավորվել էր կոռուպցիոն համակարգ, և նոր իրավիճակում խնդիր է դրված բացառել կոռումպացված համակարգի գոյությունը, բազմաթիվ մարդկանց համար այդ համակարգը կոմֆորտ իրավիճակ էր, նրանք հալալ քրտինքով աշխատելու սովոր չեն ապրել, այս շարժումն էլ ոչ թե հայրենիքի փրկության շարժում է, այլ ռևանշի են ձգտում՝ նկատի ունեմ կոռումպացված համակարգի վերականգնումը: Բայց նման փորձերը դատապարտված են անհաջողության»:
Հարցին, թե ինչպես է վերաբերվում մտավորականների հավաքներին, որոնցում վերջերս նաև սպառնալից հայտարարություններ հնչեցին Սփյուռքի մի հատվածի հասցեին, վիրավորական արտահայտություններ են հնչում հասարակության տարբեր շերտերի, մի շարք ՀԿ-ների նկատմամբ, ոչնչացնելու կոչերով են հանդես գալիս, քաղաքագետը պատասխանեց. «Դա ավկայում է այն մասին, որ նրանք մտավորականներ չեն: Քաղաքական, հասարակական խուլիգանությունը վայել չէ մտավորականին՝ և բառամթերքի առումով, և հռչակվող սկզբունքների: Դրանք հիմնականում այն մարդիկ են, որոնց համար դիսկոմֆորտ է ոչ կոռումպացված համակարգում ապրելը: Դա լուրջ խնդիր է»:
Մանրամասն՝ տեսանյութում:
