«Քաղաքական տեղապտույտը շաունակվում է: «Առաջին լրատվական»-ի հետ զրույցում այս կարծիքը հայտնեց «Ժառանգություն» կուսակցության վարչության ղեկավար Նարինե Դիլբարյանը:
«Ակնկալիքներ կան, որ հունվարի վերջին նախատեսված՝ փոխվարչապետների մասնակցությամբ եռակողմ հանդիպմանը կկարողանանք արծարծել գերիների հետ կապված հարցը, և գուցե խուսափել միայն մի կողմին՝ Թուրքիային և Ադրբեջանին ձեռնտու՝ ճանապարհների բացումից: Կան դրական սպասումներ դեպի դրական գործընթացներ»,- նշեց Դիլբարյանը:
«Այսօր թիվ մեկ հարցը գերիների վերադարձի հարցն է»,- անդրադառնալով պատերազմի հետևանքների վերացման գործընթացին՝ ասաց «Իմ քայլը» խմբակցության պատգամավոր Հովիկ Աղազարյանը: Նա համոզմունք հայտնեց առ այն, որ մեկ ամսվա ընթացքում այդ հարցին լուծում կտրվի:
«Հաջորդը ճանապարհների ապաշրջափակման հարցն է, մենք պետք է այն դիրքորոշումն ունենանք, որ այն որքան որ ընդունելի և ձեռնտու լինի հակառակորդների համար, այնքան էլ մեզ համար պետք է լինի ձեռնտու և ընդունելի լինի:
«Անտարես» հրատարակչության տնօրեն Արմեն Մարտիրոսյանը կարծիք հայտնեց, որ հաղորդուղիների ապաշրջափակման դեպքում «մեր տնտեսությունը կդառնա իսկական տնտեսություն և մրցակցությունը կլինի համաշխարհային մրցակություն»:
«Մեր տնտեսությունը աշխարհի համար կդառնա հասանելի, աշխարհինը՝ մեզ համար: Համաշխարհային շուկաների ճնշման տակ մեր շուկաների էֆեկտիվությունը կավելանա»,- նշեց Մարտիրոսյանը:
Նա նաև ընդգծեց, որ այս պատերազմը կրթական պարտություն էր:
«Փաշինյանն իր քայլերով խաղաղության ճանապարհը չի բռնել»,- նշեց «Անտարեսի» տնօրենը:
Նարինե Դիլբարյանի խոսքով՝ «Ժառանգությունը» կարծում է, որ արտահերթ ընտրությունները կարող են ներքաղաքական իրավիճակի բնական հանգուցալուծումը լինել: «Սակայն եթե այդ ընտրությունները կազմակերպի վարչապետ Փաշինյանը, դարձյալ դա կարող է լուրջ խնդիրներ առաջացնել»:
Մանրամասն՝ տեսանյութում:
