«Առաջին լրատվականը» տեղեկացրել էր, որ հուլիսի 15-ին Մոսկվայի խոշորագույն առևտրի կենտրոններից մեկում՝ «Երևան փլազայում», որը, ըստ որոշ տեղեկությունների, պատկանում է Սերժ Սարգսյանի աշխատակազմի ղեկավար Կարեն Կարապետյանի եղբորը՝ Սամվել Կարապետյանին, տեղի են ունեցել խուզարկություններ, որոնց ժամանակ հայտնաբերվել են մի շարք խախտումներ: Մոսկվայի դատախազի տեղակալ Ալեքսանդր Կոզլովը երեկ գլխավոր քննչական ծառայությունից պահանջել է, որպեսզի վերացվեն այդ խուզարկության ժամանակ կատարված խախտումները, իսկ սեփականատերերին վերադարձվեն առգրավված բոլոր փաստաթղթերն ու իրերը՝ խուզարկությունը համարելով չհիմնավորված: Այս մասին հաղորդում է RBC-ն:
Նշվում է նաև, որ քննիչ Գենադի Ուդունյանը, որը խուզարկության որոշում էր կայացրել, չի անցել վերատեստավորում: Ըստ լրատվամիջոցների՝ «Երևան փլազայի» դեմ այս քննությունը սկսվել է Մոսկվայի շրջաններից մեկի նախկին ղեկավարի դեմ հարուցված քրեական գործի շրջանակում: Նրա գործն ուղարկվել է դատարան, սակայն՝ ըստ մասնագետների՝ բավական չհիմնավորված ապացույցներով: Եվ որպեսզի շրջանի ղեկավարի վրա լրացուցիչ «կոմպրոմատ» լինի, Ուդունյանը փորձել է քրեական գործեր բացել շրջանի ղեկավարի հետ կապված բոլոր մարդկանց դեմ՝ լրացուցիչ փաստարկներ ունենալու համար: Ընդ որում՝ Ուդունյանը բոլոր այդ գործերի մանրամասները ակտիվորեն հանձնել է լրատվամիջոցներին՝ իր ոչ արհեստավարժ գործողություններն ինչ-որ կերպ արդարացնելու համար: Այս մասին ասել է նաև ձերբակալված նախկին պաշտոնյայի փաստաբաններից մեկը:
