Կորոնավիրուսային համավարակի պատճառով սոցիալ-տնտեսական դժվարություններին զուգահեռ աշխատաշուկայում 2020 թվականի 10 ամիսների կտրվածքով աշխատանք փնտրողների թիվն աճել է 3000-ով՝ հասնելով 88356 մարդու, որոնցից գործազուրկի կարգավիճակ է ունեցել 60668-ը: Գործազրկության ամենաբարձր ցուցանիշ արձանագրած մարզերը Շիրակն ու Լոռին են՝ համապատասխանաբար՝ 20 և 15 տոկոս ցուցանիշներով:
Տնտեսական առկա դժվարությունները չեն կասեցրել Հայաստանի Հանրապետության տարածքում նոր կազմակերպությունների գրանցումը: 2020 թվականի 10 ամիսների կտրվածքով նոր գրանցված կազմակերպությունների թիվն աճել է 6645-ով և հասել է 52845-ի: 2020 թվականի հոկտեմբերի տվյալներով, ի տարբերություն տարեսկզբի գրանցված աշխատողների թիվն աճել է մոտ 38 հազարով և կազմել է 638 787 մարդ: Չնայած աշխատողների թվաքանակի աճին, մասնագետները նշում են, որ ավելացած գրանցված աշխատատեղերի մեծ մասը ստվերից դուրս եկած հատվածն է և կապված հարկային մարմինների կողմից իրականացվող վարչարարության հետ: Վիճակն այնքան էլ բարվոք չէ քաղաքացիների տնօրինվող եկամուտների առումով, քանի որ կորոնովիրուսի համավարակի հետևանքով առաջացած տնտեսական դժվարությունները նվազեցրել են քաղաքացիների եկամուտները և այս առումով 2020 թվականի առաջին 10 ամիսների կտրվածքով միջին անվանական աշխատավարձը 191 հազար դրամից դարձել է 181 հազար, այսինքն կրճատվել է մոտ 5 տոկոսով:
