Թուրքական Vatan թերթի փոխանցմամբ՝ երեկ տեղի է ունեցել Բարձրագույն ռազմական խորհրդի (Yüksek Askeri Şura, YAŞ) հերթական նիստը։ Նիստում որոշվել է Գլխավոր շտաբի պետի տեղակալ, բանակի գեներալ Ասլան Գյուլերին հեռացնել Գլխավոր շտաբից և փոխարենը նշանակել Ռազմական ակադեմիաների հրամանատար։
Վերջին տեղը թափուր էր մնացել այն բանից հետո, երբ մայիսի վերջին Balyoz ռազմական հեղաշրջման գործի շրջանակներում ձեբակալվել էր Ռազմական ակադեմիաների հրամանատար Բիլգին Բալանլըն։
Հիշեցնենք, որ գեներալ-լեյտենանտ Ասլան Գյուլերը Թուրքիայում հայտնի դարձավ 2007 թվականի սեպտեմբերի 19-ին, երբ Թուրքիայի նախագահ Աբդուլլահ Գյուլն ինքնահռչակ Հյուսիսային Կիպրոսի թուրքական հանրապետությունից վերադարձավ Անկարա։
Վերջինիս «Էսենբողա» օդանավակայանում դիմավորողների թվում էր հայտնվել նաև Ասլան Գյուլերը, որը Գյուլի ձեռքը սեղմելուց հետո հրաժարվել էր նույնն անել նրա կնոջ պարագայում՝ վերջինիս ձեռք թողնելով պարզած վիճակում։