Քաղաքագիտության դոկտոր, պրոֆեսոր Լևոն Շիրինյանն այսօր լրագրողների հետ հանդիպման ժամանակ խոսեց Վրաստանի նախագահ Միխեիլ Սաակաշվիլիի՝ վերջերս ադրբեջանական «The business year – Azerbaijan» պարբերականին տված հարցազրույցի մասին:
Շիրինյանը նշեց, որ թեև Վրաստանում ասում են, որ Սաակաշվիլիի խոսքերը Ռուսաստանի դեմ են ուղղված, սակայն, քաղաքագետի կարծիքով, դրանք հիմնականում հակահայկական բնույթ ունեն:
Շիրինյանի գնահատմամբ՝ նման հայտարարությամբ Վրաստանի նախագահն անտեսում է Վրաստանի լիիրավ քաղաքացի համարվող ջավախահայության պատիվն ու արժանապատվությունը: Շիրինյանը համոզված է, որ Վրաստանի նման քաղաքականությունը օրգանական շարունակությունն է 1918-1920 թվականներին Վրաստանի իրականացրած քաղաքականության: Ըստ նրա՝ Վրաստանը ձգտում է նման ճնշումներով էլի ինչ-որ բան պոկել Հայաստանից, սակայն Շիրինյանը համոզված է, որ Հայաստանի հետագա թուլացումը վնաս է Վրաստանին և կբերի վերջինիս կործանմանը, քանզի այդ դեպքում Վրաստանը կդառնա մանրադրամ թուրք-ադրբեջանական տանդեմի համար:
Քաղաքագետի կարծիքով՝ Հայաստանի արտգործնախարարությունը պետք է հստակ պատասխաներ Սաակաշվիլիի հայտարարությանը, իսկ չպատասխանելը, ըստ Շիրինյանի, խոսում է աբստրակտ դեմոկրատիայի և մեռած քաղաքականության մասին, որը ոչ մի դրական բան չի տալիս Հայաստանին. «Այդ որդեգրած քաղաքականությունը սխալ է և Հայաստանի համար նորանոր խնդիրներ է առաջացնում: Հայաստանի ԱԳՆ-ը պետք է հատուկ հայտարարությամբ հանդես գար և որոշակի քայլեր իրականացներ»: