Առողջապահության համաշխարհային կազմակերպության (ԱՀԿ) փորձագետների խումբը հունվարին կմեկնի Չինաստան՝ կորոնավիրուսի աղբյուրը գտնելու համար: Այս մասին հայտարարել է առաքելության անդամ Ֆաբիան Լենդերտցը, գրում է «Ինտերֆաքս»-ը:
Նա նշել է, որ փորձագետներն արդեն քննարկումներ են սկսել Չինաստանից ժամանած գիտնականների հետ: Ամենայն հավանականությամբ, ԱՀԿ մասնագետները կմեկնեն Ուհան:
«Խոսքը մեղավոր երկիրը գտնելու մասին չէ: Ուղղակի պետք է փորձենք հասկանալ, թե ինչ է տեղի ունեցել, և հետո տեսնել, թե արդյոք մենք կարող ենք, հիմնվելով այդ տեղեկատվության վրա, ապագայում փորձել նվազեցնել ռիսկը»,- ասել է Լենդերտցը:
Փորձագետները ցանկանում են պարզել՝ արդյո՞ք վիրուսը շրջանառվել է մինչև դրա առաջին հայտնաբերումը: Նրանք նաև կուսումնասիրեն Ուհանում գտնվող շուկան՝ հնարավոր վայրը, որտեղ վիրուսը կենդանուց փոխանցվել է մարդուն:
