Չնայած հայտարարություններին, Բաքուն լավ գիտակցում է Մինսկի խմբի անհրաժեշտությունը հենց իր շահերի համար

Երևանում են ղարաբաղյան կարգավորմամբ զբաղվող ԵԱՀԿ Մինսկի խմբի համանախագահները, որոնք նախ հանդիպում կունենան Արտաքին գործերի նախարարությունում, ապա Կառավարությունում՝ Հայաստանի վարչապետ Նիկոլ Փաշինյանի հետ։ Մինսկի խմբի ամերիկացի եւ ֆրանսիացի համանախագահները ժամանել են Երեւան։ Մինչ այդ, նրանք Բաքվում էին եւ հանդիպել են Ալիեւի հետ, ով կոշտ գնահատականներ է տվել խմբի գործունեությանը։ Նա ասել է, որ ինքը չի հրավիրել համանախագահներին, եւ որ Մինսկի խումբը ոչ մի դեր չի ունեցել հակամարտության կարգավորման գործընթացում: Նա ասել է, որ հակամարտության կարգավորումը ամբողջովին փոխել է իրավիճակը տարածաշրջանում: «Ներկայում տարածաշրջանում բացարձակապես նոր իրավիճակ է ստեղծվել, եւ համաձայն եմ Ռուսաստանի նախագահ Վլադիմիր Պուտինի գնահատականի հետ, որ Լեռնային Ղարաբաղի հակամարտությունն արդեն մնացել է պատմության մեջ», ասել է նա: Հատկանշական է, որ ռուս համանախագահը մյուսների հետ չի ժամանել Բաքու։ Ալիեւը ամերիկացի ու ֆրանսիացի համանախագահների հետ հանդիպմանը նույնությամբ կրկնել է ավելի վաղ Պուտինի ու Լավրովի գնահատականները խմբի գործունեության եւ նոր իրավիճակի մասին։ Թեեւ ստորագրվել է ընդամենը հրադադարի մասին հայտարարություն, սակայն Մոսկվան ու Բաքուն գտնում են, որ սա հակամարտության կարգավորում է։ Նման գնահատականներ է տվել նաեւ Անկարան։ Ի դեպ, ուրբաթ օրը ռուսական որոշ լրատվականներ պնդում էին, թե լավրովյան դիվանատգիտական օրակարգում այլև չկա ՄԽ։ Ֆրանսիացի ու ամերիկացի համանախագահների այցը տարածաշրջան ուղեկցվեց Հին Թաղեր ու Խծաբերդ գյուղերի վրա ադրբեջանա-թուրքական հարձակմամբ, իսկ թե ուր էին ռուս խաղաղապահները, դա արդեն այլ թեմա է։ Թեմայի շուրջ «Առաջին լրատվական»-ը զրուցել է Երևանի մամուլի ակումբի նախագահ Բորիս Նավասարդյանի հետ: