«Մեր երիտասարդները կյանքեր տվեցին, նրանք հերոսաբար են կռվել, ականատեսները պատմել են նրանց հերոսությունները։ Նրանք փայլուն կատարեցին իրենց պարտքը հայրենիքին՝ այսօրվա սերնդին մի շատ մեծ խորհուրդ թողեցին, խորհուրդ, որ միայն պայքարով կարելի է հասնել հաղթանակի»։
Այս մասին ասաց ԵՊՀ պատմության ֆակուլտետի դեկան դոկտոր, պրոֆեսոր Էդիկ Մինասյանը, ով նույնպես համալսարանի բակում էր՝ մոմավառությամբ հարգելու նահատակված զինվորների հիշատակը։ Նա նշեց, որ ութ զոհ ունեն պատմության ֆակուլտետից և հավելեց, որ այս շրջանի պատմությունն ինքն է գրում։
«ժամանակավոր է պարտությունը, կորցրած դրախտային հողերը հետ կբերվեն, բայց երիտասարդների մահը անդառնալի է,- նշեց Մինասյանը։
«90-ականներին հաղթող էինք, այսօր պարտվող, բայց տղաների արածը անպայմանորեն կգնահատվի, կմտնի պատմության դասագրքերում, ես խոստանում եմ»,- ասաց պրոֆեսորը, հավելելով, որ հասարակությունը թևաթափ է այսքան կորուստներից հետո, այսօր էլ սահմանային հատվածներում անորոշություններ կան, գյուղացիներն իրենք են պաշտպանում հողը։
«Իշխանության գործը խեղճ գյուղացիների վրա է, նույնիսկ սահմանները որոշված չեն։ Մարդիկ շատ դեպքերում դուրս են գալիս ու հայտնվում ռազմագերու կարգավիճակում, որովհետև սահման չկա, պետությունը հիմա անգործության է մատնված»։
Մինասյանի խոսքով՝ հաջողություն կունենանք, եթե նոր իշխանություն լինի, համակարգը ամրապնդվի և բանակցությունները շարունակվեն։
Մանրամասն՝ տեսանյութում:
