Պանամայի նախկին բռնակալ Մանուել Նորյեգուն ֆրանսիական իշխանությունների կողմից արտահանձնվելու է Պանամային: Այս մասին France Presse գործակալությանն ասել է Նորյեգայի փաստաբան Իվ Լեբերկյեն: Փաստաբանն ասել է, որ արտահանձման թույլտվությունը ստորագրվել է Ֆրանսիայի վարչապետ Ֆրանսուա Ֆիյոնի կողմից դեռ հուլիսի 6-ին: Սակայն նրա արտահանձման կոնկրետ ժամկետ հայտնի չէ:
Ֆրանսիայի իշխանությունները օգոստոսի 1-ին հայտարարել էին արտահանձման մասին այն բանից հետո, երբ Պանամայի իշխանությունները ստացել էին ԱՄՆ կառավարության համաձայնությունը: Բանն այն է, որ մինչև 2010 թ. Նորյեգան գտնվում էր ամերիկյան Մայամիի բանտում, որտեղից էլ 2010 թ. արտահանձնվել էր Ֆրանսիային:
Նորյեգան 1983-1989 թթ. եղել է Պանամայի բռնապետ, նրան պաշտոնանկ են արել ամերիկյան զինվորականները, որից հետո Մայամիի դատարանը 1992 թ. նրան դատապարտել էր 30 տարվա ազատազրկման: Իսկ անցած տարի Ֆրանսիան նրան մեղավոր էր ճանաչել փողերի լվացման և կոռուպցիայի մեջ: