Հնդկաստանի առաջին 17 բնակիչները ռուսաստանյան «Սպուտնիկ V» պատվաստանյութ են ստացել: Այդ մասին, ANI գործակալությանը հայտնել է Noble հիվանդանոցի կլինիկական հետազոտությունների բաժանմունքի ղեկավար դոկտոր Ս.Կ.Ռաութը:
«Տասնյոթ առողջ կամավորներ վերջին երեք օրվա ընթացքում ռուսաստանյան «Սպուտնիկ V» պատվաստանյութ են ստացել մարդկանց վրա փորձարկումների շրջանակներում: Նրանք գտնվելու են հսկողության ներքո, այնուհետեւ 21 օր անց նրանց կտան պատվաստանյութի եւս մեկ չափաբաժին»,-ասել է նա: Dr. Reddy`s Laboratories հնդկական դեղագործական ընկերությունը դեկտեմբերի սկզբին հաղորդել էր, որ Ռուսաստանի ուղղակի ներդրումների հիմնադրամի հետ համատեղ Հնդկաստանում սկսել են «Սպուտնիկ V» պատվաստանյութի փորձարկումների երկրորդ և երրորդ փուլերը՝ բժշկության ոլորտում հնդկական կարգավորիչից անհրաժեշտ թույլտվություն ստանալուց հետո:
Ավելի վաղ Հնդկաստանի դեղամիջոցների գլխավոր վերահսկիչը հաղորդել էր, որ պատվաստանյութի հետազոտությունների երկրորդ փուլի ընթացքում դրան կմասնակցեն 10 կամավորներ:
Նշվում է, որ փորձարկումների երկրորդ փուլի ավարտվելուց հետո Noble հիվանդանոցը նաև կանցկացնի պատվաստանյութի հետազոտությունների երրորդ փուլը, որին կմասնակցի շուրջ 1,5 հազար կամավոր: Հնդկաստանն աշխարհում երկրորդ տեղում է գտնվում կորոնավիրուսով վարակվածների թվով: Առողջապահության նախարարության վերջին տվյալների համաձայն, երկրում գրանցվել է COVID-19-ի 9,6 մլն դեպք: Դրա հետ մեկտեղ հիվանդությունը հաղթահարել Է ավելի քան 9,1 մլն մարդ, բուժումը շարունակում է շուրջ 396 հազար հիվանդ, կորոնավիրուսից և ուղեկցող հիվանդություններից մահացել է 140 հազար մարդ:
