Ադրբեջանական APA լրատվական գործակալության փոխանցմամբ՝ Ադրբեջանում Թուրքիայի դեսպան Հուլուսի Քըլըչը մամլո ասուլիսի ժամանակ անդրադարձել է թուրք-ադրբեջանական հարաբերություններին.
«Չնայած ԶԼՄ-ներում տեղ գտած տեղեկատվությանը, Թուրքիան շահագրգռված չէ Գաբալայի ռադիոտեղորոշիչ կայանի (ՌՏԿ) համատեղ օգտագործմամբ։ Այդ հարցը բացակայում է Թուրքիայի պլաններում։ Էրդողանի ադրբեջանական այցի ընթացքում այդ հարցը չի քննարկվել։
Փոխարենը քննարկվել է ղարաբաղյան հակամարտության կարգավորումը, երկկողմանի հարաբերությունները, տնտեսական խնդիրները, առևտրային ոլորտում փոխըմբռնման մասին համաձայնագրի ստորագրումը, անցագրային ռեժիմի վերացումը։
Էրդողանն իրազեկվել է ղարաբաղյան հակամարտության կարգավորման վերջին զարգացումներից։ 18 տարի առաջ մենք «ադրբեջանական տարածքների օկուպացման» պատճառով փակեցինք Հայաստանի հետ սահմանը։ Մենք ցանկանում ենք, որպեսզի խնդիրը լուծվի։ Թուրքիան մշտապես Ադրբեջանի կողքին է։ Հայ-թուրքական խնդրի լուծման համար «անհրաժեշտ» է լուծել ղարաբաղյան հիմնախնդիրը»։
Քըլըչը հավելել է, որ Էրդողանը Բաքվում հանդիպում է ունեցել Ադրբեջանի Հանրապետության պետական նավթային ընկերության (SOCAR) ղեկավարության հետ և քննարկել թուրքական տարածքով ադրբեջանական գազի տարանցման հարցը։ Ըստ Քըլըչի՝ այդ բանակցային գործընթացը կավարտվի մինչև սեպտեմբեր։
Հիշեցնենք, որ ապրիլի վերջին էլ Հուլուսի Քըլըչը հայտարարել էր, թե հայ-թուրքական սահմանը փակ է արդեն 18 տարի, և այդ վիճակը կարող է պահպանվել ևս 80 տարի:
