«Սիրում եմ ձեզ, բոլորիդ, որովհետև պլյուս քառասունի տակ աշխարհի որևէ երկրում երբևէ այսքան մարդ չի հավաքվել»,- նման խոսքերով էլ իր ելույթը սկսեց ՀՀՇ վարչության նախագահ Արամ Մանուկյանը:
Նա նշեց, որ վախեցած իշխանությունը երկխոսում է ժողովրդավարության մասին`փակելով ճանապարհները, քաղաքացուն իր շրջանից դուրս չթողնելով, չթողնելով գալ հանրահավաք` ազատ խոսք լսելու. «Այսպե՞ս են երկխոսում: Խղճալ է պետք իրենց՝ ուրիշ ոչինչ, իրենք այս երկրում տեղ չունեն: Երկխոսությունը բլեֆ է` էլ չեմ հավատում։ Իմ ընկերները գուցե ինձ կքննադատեն, թե պետք է սպասել, սակայն ես չեմ հավատում։ Իշխանությունը մի զգայարան ունի՝ վախն է այս ժողովրդից։ Եվ վախենում են, երբ այդ զգայարանով զգում են, որ այս ժողովուրդը ուժեղ է: Ես շատ եմ ուզում, որ սեպտեմբերը գա»:
Մանուկյանը խոսեց նաև Հայաստանում ծայր առած արտագաղթի սարսափելի տեմպերի մասին՝ նշելով, որ այս իշխանությունը դատարկում է երկիրը և դրանով իսկ դատապարտված է. «Վերջին վեց ամիսների ընթացքում երկիրը լքողների թիվն անցավ 90.000-ը՝ սա իրենց հրապարակած կեղծված թիվն է։ Ամեն տարի միայն Բելգիա դիմում են 1400 հայ, և նույն թվերն են Ֆրանսիայում, Հոլանդիայում, այլուր։ Երկիրը դատարկվում է, երկիրը սպառվում է պետական իշխանական կազմակերպական մեքենայի պատճառով։ Աֆրիկայի հեռավոր երկրներում հայ բանվորներ են աշխատում»։
Վերջում Մանուկյանը շեշտեց, որ նմանատիպ իշխանությունից ինքը բարոյական փոփոխություն հուսալու հիմք չունի, և խորհուրդ տվեց. «Պատրաստվեք արտահերթ ընտրություններին, մենք հասնելու ենք դրան»։
