ԱՄՆ-ի գործող նախագահ Դոնալդ Թրամփն իր կողմնակիցներին ակնարկել է, որ 2024 թվականի ընտրություններում իր թեկնածությունը կառաջադրի նախագահի պաշտոնի համար, եթե իրեն չհաջողվի այդ պաշտոնում մնալ 2020 թվականի ընտրությունների արդյունքներով: Այդ մասին, հաղորդել է Politico հրատարակությունը։
«Դրանք հիանալի չորս տարիներ Էին: Մենք փորձում ենք ևս չորս տարի մնալ: Եթե ոչ՝ մենք ձեզ հետ կտեսնվենք չորս տարի անց»,-թերթը մեջբերում է արել Թրամփի ելույթից, որով նա հանդես Է եկել Հանրապետական կուսակցության Ազգային կոմիտեի անդամների առջև: Ավելի վաղ 2024 թվականին իր թեկնածությունը նախագահի պաշտոնում առաջադրելու Թրամփի մտադրության մասին հաղորդել են տարբեր ԶԼՄ-ներ:
New York Times թերթը գրել է, որ Թրամփը 2024 թվականի ընտրություններում իր թեկնածությունն առաջադրելու մասին կարող Է հայտարարել, հենց որ հաստատվի 2020 թվականին նրա մրցակից Ջո Բայդենի հաղթանակը: Daily Beast հրատարակությունը, վկայակոչելով իր աղբյուրներին, հաղորդել է, թե Թրամփը միտք ունի, որ իր թեկնածությունն առաջադրելու կապակցությամբ միջոցառումը կանցկացնի պաշտոնակալության արարողության օրը կամ այդ նույն շաբաթվա ընթացքում:
Թրամփը չի ճանաչում Բայդենի հաղթանակը նոյեմբերի 3-ին անցկացված նախագահական ընտրություններում, ինչը ցույց են տալիս նախնական տվյալները: Նա մի շարք դատական հայցեր է նախաձեռնել՝ նպատակ ունենալով քվարկության արդյունքների վերանայման հասնել մի քանի նահանգներում։
