Հյուսթոնում տեղի է ունեցել հարսանյաց արարողություն, որն անց է կացրել համակարգչային ծրագիրը։ Այն իր ստեղծողի և, համատեղության կարգով, նաև՝ ամուսնացողի կողմից անվանվել է «Ձերդ պայծառափայլություն Բիտ»: Այս մասին հաղորդում է Lenta.ru կայքը՝ հղում անելով TG Daily-ին: Տոնակատարության անսովոր վարողը պսակել է վեբ-աշխատակից և IT-խորհրդատու Միգել Հենսոնին և ուսուցչուհի Դիանա Ուեսլիին:
Ինչպես նորապսակներն են պատմել Associated Press գործակալությանը, իրենք որոշել էին հարսանեկան արարողությանը ներգրավել էլեկտրոնային քահանայի, քանի որ երկուսն էլ զբաղվում են համակարգչային տեխնոլոգիաներով, երկար ժամանակ են անցկացնում ցանցում և սիրում են կարդալ գիտական ֆանտաստիկա: Հենսոնի և Ուեսլիի խոսքերով՝ նրանք ծանոթացել են Sweet on Geek կայքում, նշում է MSNBC-ին:
Երբ բանը հասել է ամուսնանալուն, սիրահարները հասկացել են, որ չեն կարողանում գտնել արարողության համապատասխան վարողի, և այդ ժամանակ որոշել են ծրագիր ստեղծել, որն էլ նրանց ամուսնացրել է: «Ձերդ պայծառափայլություն Բիտը» արարողությանը մասնակցել է տեքստի տեսքով, որը դրված է եղել 30 դյումանոց էկրանին:
Տոնական արարողությանը մասնակցել է մոտավորապես 30 մարդ: Այն տեղի է ունեցել նորապսակների ծնողների տան բակում:
Միգել Հենսոնն ու նրա ընտրյալը առաջինը չեն, որ ամուսնացել են էլեկտրոնային սարքավորման անմիջական մասնակցությամբ: 2010 թ. Ճապոնիայում երկու սիրահարների ամուսնացրել է I-Fairy անունով ռոբոտը: