Facebook սոցիալական ցանցը որոշում է կայացրել գումարով պարգևատրել բոլոր նրանց, ովքեր կհայտնեն անվտանգության հետ կապված խնդիրների մասին, որոնք կան այդ սոցցանցում: Ընկերության հայտարարության մեջ ասվում է, որ խոսքը ոչ թե այլ ընկերությունների կողմից թողարկված հավելվածների մասին է, այլ բուն կայքի հետ կապված խնդիրների: Նշվում է, որ բազային գումարը կկազմի 500 դոլար: Այս մասին հաղորդում է The Registre-ը:
Եթե օգտատերը կամ մասնագետը հայտնաբերի ավելի լուրջ խնդիրներ, ապա վարձատրության գումարն ավելի մեծ կլինի: Հատուկ այդ նպատակով բացվել է Whitehat Hacking կայքը, որտեղ օգտատերերը կարող են գրել իրենց կողմից հայտնաբերված խութերի մասին: Ընդ որում՝ պարգևատրություն կարող են ստանալ նաև Facebook-ի աշխատակիցներն ու նրանց ընտանիքի անդամները:
Այս փորձը կիրառվում է նաև այլ ընկերություններում: Մասնավորաբար՝ Google-ում, որն իր Chrome օպերացիոն համակարգի համար վճարում է բավական մեծ գումարներ, եթե օգտատերերը հաղորդում են հայտնաբերված «սողանցքերի» մասին: