Իտալիայի արտաքին գործերի նախարարությունը որոշում է կայացրել խորհրդակցությունների համար Սիրիայից հետ կանչել իր դեսպան Ակիլլե Ամերիոյին: Այս կապակցությամբ նախարարությունը հանդես է եկել հայտարարությամբ, որտեղ ասվում է, որ դեսպանը ետ է վերադառնում Իտալիա «Սիրիայում քաղաքացիական բնակչության նկատմամբ կիրառվող ահասարսուռ բռնությունների պատճառով»: Այս մասին հաղորդում է RIA-Novosti գործակալությունը:
Ավելի վաղ Սիրիայում դեսպանատունն էր փակել Քաթարը, քանի որ այդ երկրի դեսպանատան վրա իրականացվել էր հարձակում, իսկ Սիրիայի իշխանությունները դրան չեն խոչընդոտել: Այն ժամանակ ցուցարարները բողոքում էին Al-Jazeera հեռուստաալիքի կողմից, իրենց կարծիքով, կողմնակալ լուսաբանման դեմ: Այդ ժամանակ տուժել էին նաև Ֆրանսիայի և ԱՄՆ-ի դեսպանները, որոնք հարձակումից մի քանի օր առաջ ներկա էին գտնվել Համայի բազմահազարանոց ցույցին:
