«Արցախի եվրոպական շարժում» ՀԿ նախագահ Հայկ Խանումյանը համոզված է, որ ԱՄՆ Կոնգրեսի կողմից Արցախի հանրապետությանը տրամադրվող ֆինանսավորման դադարեցումը պայմանավորված է նրանով, որ այս տարի Լեռնային Ղարաբաղը Freedom House իրավապաշտպան կազմակերպության կողմից ճանաչվել է ոչ ազատ պետություն:
«Անկախության 10 տարիների ընթացքում Արցախում ժողովրդավարական հետաքրքիր զարգացումներ են տեղի ունեցել՝ առաջին և միակ անգամ Հարավային Կովկասում ընդդիմության թեկնածուն ընտրվել էր մայրաքաղաքի քաղաքապետ, խորհրդարանում կար գործող ընդդիմություն, ազդեցիկ անկախ թերթ, սակայն այս ամենը 2007-ից հետո վերացավ»,- «Առաջին լրատվական»-ի հետ զրույցում մանրամասնեց Խանումյանը:
Խանումյանը նկատեց, որ այս հանգամանքը բավականին բարդացրել է հայկական լոբբիի աշխատանքը, քանզի Արցախի ժողովրդավարական պետություն լինելը բավական կարևոր փաստարկ էր՝ համոզելու համար օտարերկրյա կառավարություններին՝ օգնություն ցույց տալ Արցախին: Նա նաև նշեց, որ 10 մլն դոլարը ֆինանսական առումով Արցախի համար բավական զգալի գումար է:
Ըստ Խանումյանի՝ այս ամենի հետևանքով բարդ դրության մեջ է հայտնվել նաև Հայաստանի Հանրապետությունը. «Արցախի անկախության ճանաչման հարցը բարձրացնելիս Հայաստանի իշխանություններն անընդհատ շեշտում էին վերջինիս ժողովրդավարական լինելու փաստը, սակայն այժմ այդ փաստարկներն այլևս չկան»:
Հայկ Խանումյանը հիշեցրեց, որ ԼՂՀ նախագահ Բակո Սահակյանն իր նախընտրական ծրագրի հենց առաջին կետում խոսում է Արցախի միջազգային ճանաչման համար տարվող քայլերի մասին. «Իսկ այսօր Բակո Սահակյանի քաղաքականության արդյունքում Արցախը ոչ միայն միջազգային ճանաչում չի ստանա, այլև ճանաչում ստանալու համար անհրաժեշտ բոլոր փաստարկներից նահանջում է»:
