Նարեկ Բեզոյանի առանձնատանը մոտ երկու ամիս ապաստանած 30-ից ավել արցախցիներ հավաքել են իրենց ունեցած չունեցածը (հիմնականում հագուստ) և պատրաստվում են առաջիկա օրերին մեկնել Արցախ։ Արցախի որ հատվածում էլ լինի՝ համաձայն են, միայն իրենց հող ու ջրի վրա։ Ասում են՝ ռուս խաղաղապահներն էլ կապահովեն իրենց անվտանգությունը։ «Մենք միշտ էլ փափագում էինք, որ ռուսական զորքը գար ու կանգներ մեջտեղը։ Ուղղակի պետք է թույլ չտային, որ էսքան զոհ լիներ։ Եթե կարիքը կար էդ 5-7 շրջանը պետք է տային, որ այսքան զոհից խուսափեինք»,-«Առաջին լրատվական»-ի հետ զրույցում ասաց Մարտունու շրջանի Գիշի գյուղից Միքայել Բալայանը։
Մարտունու շրջանում ուսուցչուհի աշխատող Արմինեն ևս սպասում է, որ բեկորային վնասվածքներ ստացած ամուսինն ապաքինվի, դուրս գրվի հիվանդանոցից, որ վերադառնան։ Ամուսինը սպա է, ինքը՝ ուսուցչուհի։ Ասաց՝ ցանկանում է ժամ առաջ վերադառնալ, որ նորից շենացնեն գյուղը, գյուղի դպրոցը, արցախցի երեխաներին նորից կրթեն ու դաստիարակեն ռազմական, հայրենասիրական ոգով, արցախցու ոգով։
Առավել մանրամասն՝ տեսանյութում