Այսօր մեկնարկեց Սփյուռքի նախարարության ծրագրերից հերթականը՝ «Երիտասարդ առաջնորդների ամառային դպրոցը»։ Սփյուռքահայ համայնքներում ակտիվ հայապահպան գործունեություն ծավալող 25 երիտասարդներ ծրագրի շրջանակներում կմասնակցեն երկշաբաթյա դասընթացների, կլսեն դասախոսություններ Հայաստանի պետական կառավարման համակարգի, երկրի ներքին և արտաքին քաղաքականության առանձնահատկությունների, մշակույթի մասին։ Ինչպես մեզ հետ զրույցում ասաց համահայկական ծրագրերի վարչության ղեկավար Ատոմ Մխիթարյանը, ծրագրի նպատակն է նոր համագործակցությունների կապեր ստեղծել Հայաստանի և Սփյուռքի միջև։
Մասնակիցների ընտրությունը կատարելիս կազմակերպիչները փորձել են ապահովել մասնակիցների աշխարհագրական բազմազանությունը և համաչափ բաշխված գենդերային կազմը։
Այսօր բացման արարողությանը մասնակցեց նաև Սփյուռքի նախարար Հրանուշ Հակոբյանը։ Նախարարը շնորհակալություն հայտնեց ծրագրի առաջին մասնակիցներին և նշեց, որ նրանցից է կախված ծրագրի հաջողությունն ու հետագա շարունակությունը։
Հ.Հակոբյանը հիշեցրեց, որ այս տարին նախարարությունը հայտարարել է երիտասարդության տարի։
«Մեր չորս առաքելություններից մեկը Սփյուռքի ներուժի ռեալիզացմանն աջակելն է։ Իսկ Սփյուռքի ներուժը նախ և առաջ երիտասարդների մեջ է։ Դուք եք այն փոքրիկ կրակները, որ պետք է ձեր շուրջ հրդեհ ստեղծեք. հայկական աշխարհ ստեղծեք։ Այս դպրոցով երեք խնդիր ենք լուծում. դուք կկապվեք հայրենիքի հետ, Հայաստանի կազմակերպությունների հետ կհամագործակցեք, ինչպես նաև իրար հետ՝ Սփյուռք-Սփյուռք կապեր կստեղծեք։ Ձեզ մաղթում եմ պետականաշինության գործում ձեր ներդրումը ունենալու ցանկություն ու իրականացում»,- մասնակիցներին ողջունեց Հրանուշ Հակոբյանը։
