Թուրքիայում հանգստյան օրերին, բացի ժամը 10։00-ից 20։00-ը ընկած ժամանակահատվածը, լինելու են պարետային ժամի սահմանափակումներ։
Այս մասին շուրջ երեք ու կես ժամ տևած նախագահական խորհրդի նիստից հետո հայտարարել է Թուրքիայի Հանրապետության նախագահ Ռեջեփ Թայիփ Էրդողանը։ Նախագահը, նշելով, որ համաճարակի ընթացքի շարունակական սրացման դեպքում անխուսափելի կդառնա բոլորի համար ցավալի հետևանքների պատճառ հանդիսացող միջոցառումների վերադարձը օրակարգ, հայտնել է նոր սահմանափակումների մասին։
Նախագահ Էրդողանը ասել է․ «Բոլոր սպորտային մրցումները կշարունակեն անցկացվել առանց հանդիսատեսի, իսկ մարզադաշտերի գործունեությունը կդադարեցվի։ 65 և ավելի բարձր տարիքի անձանց համար որոշված ժամերին իրականացվող պարետային սահմանափակումները կիրառելի կլինեն նաև 20 և ավելի բարձր տարիք ունեցող անձանց նկատմամբ, բացառությամբ աշխատողների:
Կինոթատրոնները կշարունակեն փակ մնալ մինչև տարվա վերջ։ Առևտրի կենտրոններում, սուպերմարկետներում, ռեստորաններում, գեղեցկության սրահներում աշխատանքի ժամերը սահմանվում են ժամը 10։00-ից մինչև 20։00-ը։ Արձակուրդում գտնվող դպրոցներում դասընթացները մինչև տարվա վերջ կշարունակվեն կազմակերպվել հեռավար կերպով։ Իսկ սրճարանների գործունեությունը որոշ ժամանակ ամբողջությամբ կդադարեցվի»։
Թուրքիայում վերջին օրերին աճում են կորոնավիրուսային համաճարակի արձանագրված դեպքերի թվերը։ Նոյեմբերի 17-ին գրանցվել է կորոնավիրուսային վարակման 3819 նոր դեպք, 103 հոգի մահացել է։ Ընդհանուր առմամբ Թուրքիայում կորոնավիրուսով վարակվել է 421,413, իսկ մահացել է 11,704 մարդ։ Երկրի մի շարք գյուղերում այսօր մտցվել է խիստ կարանտինային ռեժիմ։
