Հեռուստառադիոպետկոմի նախկին ղեկավար Տիգրան Հակոբյանը, Facebook սոցիալական ցանցի իր էջում բերել էր մի հետաքրքիր ասոցիացիա. «Թուրքիայում ՀԱՅԻՆ սպանելու համար ոճրագործին բռնեցին և 23 տարի տվեցին: Հայաստանում 10 ՀԱՅԻ սպանելու համար ոչ ոքի չբռնեցին և, բնականաբար, ոչ մի պատիժ էլ չտվեցին»։
«Առաջին լրատվական»-ը այս թեմայով զրուցեց փաստաբան Վահե Գրիգորյանի հետ.
«Եթե պետությունն ունի պարտականություն՝ պաշտպանել իր քաղաքացիներին, ապա ներքին իրավախախտումների արդյունքում և այս կոնկրետ դեպքում կյանքի իրավունքը պետության կողմից չի պաշտպանվել, ավելին՝ պետության կողմից շարունակաբար հովանավորվում է այդ իրավունքի խախտումն ու ոտնահարումը։
Քանի դեռ չեն բացահայտվել այդ սպանությունները, իրավունքի խախտումը շարունակվելու է։ Այս պայմաններում խոսել, թե պետությունը կոչված է իր քաղաքացիներին պաշտպանել արտաքին թշնամուց, կամ պետությունը կոչված է ապահովել կարգ ու կանոն, անիմաստ է, քանի որ ՀՀ-ն ամեն օր բացահայտորեն այդ խնդիրը անտեսում է»։
Խոսելով Մարտի 1-ի պատասխանատուների անպատժելիությունից՝ փաստաբանը հայտնեց. «Ոչ միայն մեկ մարդ չի դատապարտվել, այլ պետությունը ձեռնարկել և շարունակաբար ձեռնարկում է բոլոր հնարավոր միջոցները, որպեսզի հանկարծ որևէ մեկը չդատապարտվի գործված ոճրագործության համար»։
