Հայաստանի Հանրապետության և Արցախի համար ճակատագրորոշ այս օրերում, երբ մեզ պարտադրված անձնատվության բեռի տակ հայոց երկու պետականությունների ինքնիշխանության և կենսունակության ապագան է վտանգված, «Ժառանգություն» և Հայաստանի դեմոկրատական կուսակցությունները, հավատարիմ իրենց սկզբունքներին՝ ողջունում են ՀՀ նախագահի նոյեմբերի 16-ի ուղերձում ձևակերպված քայլաշարը, որը թույլ կտա բարդագույն այս պահին նայել անողոք ճշմարտության երեսին, անաչառ գնահատել կատարվածը, ոչ թե ձևացնել, խաբել ու խաբվել, ամենակարևորը՝ անցյալից դասեր քաղելով՝ գործել և վերականգնել պատերազմից ավերված և կորուստներ կրած Հայաստանն ու Արցախը:
Իրատեսորեն գնահատելով պահի հրամայականը և հանձնառու հայոց պետականության պահպանման և ամրապնդման պատասխանատվությամբ՝ «Ժառանգությունը» և ՀԴԿ-ն արձանագրում են՝ ՀՀ սահմանադրական կարգի ընթացակարգով ՀՀ նախագահին պետք է մանդատ տալ գործելու արտաքին դիվանագիտական և ներքին քաղաքական ասպարեզներում, ձևավորել մասնագիտական որակավորում, ճգնաժամային կառավարման կարողություն, պետականության հանդեպ բարձր պատասխանատվություն ունեցող ժամանակավոր կառավարություն, որը հնարավորինս սեղմ ժամկետում կնախապատրաստի արտահերթ խորհրդարանական ընտրությունները: Պաշտպանում և աջակցում ենք ՀՀ նախագահի առաջարկած հանգուցալուծումները, որոնց հետևանքով ՀՀ նախագահը կդառնա սահմանադրական բարեփոխումների երաշխավորը, որովհետև գործող սահմանադրության պատճառով է նաև այս համակարգային ճգնաժամը: Հայոց պետականությունը փրկության կարիք ունի:
«Ժառանգություն» կուսակցության և ՀԴԿ վարչություններ
