Քաղաքագետ Սարո Սարոյանը Ֆեյսբուքի իր էջում գրել է.
Այս պահին ամենից կարեւոր հիմնակետը, որտեղից պետք է կանգնեցնել երկրի անկման ընթացքը, պետական կառավարման լծակներն իրենց ձեռքում պահող մարդկանց՝ ստեղծված իրավիճակից ելքեր տեսնելու պատկերացումները պարզելն է: Հենց այդ հարցադրման դեպքում կպարզվի, որ այդ մարդիկ կամ անզոր են ելքեր առաջարկելու հարցում, կամ իրենց պատկերացրած ելքերը իրականում ավելի խորացող ճգնաժամ են գուժում:
Հենց այդ իրավիճակի ամրագրման դեպքում ի հայտ կգան տեսական հարթությունում իմ արձանագրումները՝
ա. երկրում պետական կառավարումը պետք է վերագործարկվի, չկա պետական կառավարում, ուրեմն չկա պետություն,
բ. պետական կառավարումը կարող է վերագործարկվել այն անձի (թիմի) կողմից, ով հանրային վստահություն կապահովի (լիակատար վստահության մասին չէ խոսքը, խոսքը հնարավոր մաքսիմալ վստահության մասին է, իսկ լիակատար վստահությունը կարող է ապահովվել միայն գործով), եւ ով կերաշխավորի հանրային համերաշխությունը պահելու հանձնառությունը ու որպես քաղաքական դաշտի համար չեզոք շրջանակ կհանդուրժվի քաղաքական դաշտում ակտիվություն ցուցաբերող միավորների մեծամասնության կողմից,
գ. կուսակցական բոլոր շրջանակները չեն կարող լինել համախմբող օղակի դերում, քանի որ օբյեկտիվորեն վանելու են մյուսներին՝ հանրությանը հնարավորություն տալով իրենց թեկուզեւ ազնիվ քայլերը բնութագրել որպես աթոռակռիվ,
դ. նոր քաղաքական սուբյեկտը պետք է լինի կամային, կառավարման փորձով, գիտակ ու պետականությանը նվիրված անձ:
Պետական կառավարման լծակներն այսօր իրենց ձեռքում պահող պաշտոնյաները քաղաքական դաշտի մեծամասնության համար չեզոք, հանդուրժելի, հանրային համերաշխության ապահովման երաշխիքներ տվող նման անձի հետ միայն կկարողանան հարաբերվել եւ ստանալ այս իրավիճակից քիչ կորուստներով դուրս գալու ելքերը:
Պատրաստ եմ նման անձի ի հայտ գալու դեպքում օժանդակել այդ անձին ու ստանձնել իմ չափով պատասխանատվությունը պետական կառավարումը վերագործարկելու, երկրում անցումային փուլը հնարավոր քիչ կորուստներով անցնելու եւ երկիրը արտահերթ ընտրություններին նախապատրաստելու գործընթացում: Եթե չգտնվի նման անձ, պատրաստ եմ ստանձնել նաեւ լիակատար պատասխանատվություն ճգնաժամային կառավարումը երկրում ապահովելու համար:
