Դամասկոսի արվարձանային Էրբին քաղաքում այսօր զոհվել են 6 ընդդիմադիրներ, տասնյակ քաղաքացիներ վիրավորվել են: Այս մասին հաղորդում է Reuters գործակալությունը՝ հղում անելով ականատեսներին: «Մարդիկ տուն էին վերադառնում Ռամադանի առթիվ կազմակերպված աղոթքից հետո: Կեսգիշերին մոտ քաղաք են ներխուժել ոստիկանության մեքենաներ, որոնց վրա տեղադրված են եղել գնդացիրներ։ Ոստիկանները հավաքվել են քաղաքի կենտրոնում, ապա սկսել են անցնել փողոցներով՝ կրակելով գնդացիրներից»,- պատմել է ականատեսը:
Մոտ 20 տանկ է մտցվել Լիբանանին սահմանամերձ Զաբադանի քաղաք։ Քաղաքի բնակչության շրջանում կան վիրավորներ: Այս մասին հաղորդում է Reuters գործակալությունը: Քաղաքը պաշարվել է այն բանից հետո, երբ այստեղ անցկացվել են ցույցեր՝ ի պաշտպանություն Համա քաղաքի ընդդիմադիր շարժման, որը նախօրեին փորձել են ճնշել Սիրիայի իշխանությունները՝ սպանելով առնվազն 100 մարդու:
