«Այն, որ մեզ համար ծանրագույն պայմաններով զինադադար է կնքվել՝ պարզ է։ Վերլուծելու շատ քիչ բան կա։ Առաջինը՝ բոլոր միջոցներով ռազմական դրության մասին օրենքի տառին համապատասխան պետք է կասեցվի լեգիտիմ իշխանության հիմքերը քայքայելու փորձերը, որը նույն ինքն է, ինչ-որ պետականության հիմքերը խարխլելը՝ մինչև իրադրությունը կայունանա և հանգիստ իրավիճակում համապարփակ վերականգնման ծրագիր ընդունվի»,- «Առաջին լրատվական»-ի հետ զրույցում նման տեսակետ հայտնեց քաղաքագետ Լևոն Շիրինյանը։
Ըստ մեր զրուցակցի՝ դրանից հետո հանգիստ իրադրության մեջ, առանց հույզի ու դեմագոգիկ ճառերի պետք է որոշումներ կայացվեն. «Սա առաջիկայի համար նկատի ունեմ, որից հետո կարող է որոշում ընդունվել՝ խորհրդարանն արձակել կամ ոչ։ Նման պայմաններում անթույլատրելի է ինքնագործ նախաձեռնությունները, 17 «ակումբների» գործունեությունը և նման բաներ։ Երկրորդ՝ ես կարծում եմ, որ «մահ թշնամուն» կարգախոսը պետք է փոխարինվի «մահ թավիշին» կարգախոսով։ Եվ եթե դեմոկրատիա, ապա միայն ռազմական դեմոկրատիա»։
Շիրինյանի դիտարկմամբ՝ ակնհայտ է, որ մեզնից բացի, Էրդողան-Պուտին նախաձեռնության կյանքի կոչված իրողությունից դժգոհ են նաև որոշակի կոնկրետ ուժեր՝ Հայաստանից դուրս, օրինակ՝ Ֆրանսիան. «Տարօրինակ է Մինսկի խմբի երկու համանախագահների պասիվութունը։ Երրորդ՝ անթույլատրելի է Մեղրու հատվածում թուրքերին որևէ իրավասություն տալը, որը միջազգայնորեն ճանաչված պետության ինքնիշխանությունը իջեցնելու հատուկ նպատակ ունի և դեպի արևելք մահաբեր պանթյուրքիզմի ցամաքային կապի ապահովում է»։
Մեր զրուցակցի խոսքով՝ հայկական կողմը Հայաստանի աշխարհաքաղաքական դիրքով շահագրիգիռ երկրների հետ, օրինակ՝ Իրան, Չինաստան, պետք է փորձի անպայմանորեն թուլացնել զինադադարի շղթաները. «Հայկական կողմը պետք է որոնի ուղիներ զինադադարի պայմանների վերանայման համար՝ ընդհուպ մինչպատերազմյան իրավիճակի վերականգնում։ Ես կարծում եմ, որ զինադադարը պետք է դառնա համապարփակ հայկական պայքարի նոր մեկնակետ։ Կառավարությունը պարտավոր է Ազգային ժողովի հետ համատեղ վերակառուցում անել՝ ինչպես կառավարության կառուցվածքում, այնպես էլ նրա անդամների ընդգրկման հարցով, այսինքն՝ նախարարների փոփոխություն»:
Ըստ նրա՝ անպայմանորեն պետք է պահպանել հայկական զինուժի մարտունակությունը, պետք է վերակազմակերպվի բանակը՝ նոր գեոստրատեգիական իրողությունների պահանջով. «Չենք կարող ունենալ ապահով ներկա և ապագա, եթե չեն զարգանալու գիտությունը, կրթությունը, սեփական արտադրության արդյունաբերությունը, տեխնոլոգիական բարձր ցուցիչներով և արդիական ճյուղերը։ Այս պարագայում գործունեության ոլորտ պետք է ընդգրկել հայկական համաշխարհային գիտական ներուժը, ինչպես նաև շահագրգիռ ուժերին»։
Շարունակելով՝ Շիրինյանն ասաց. «Խորը ցավակցություն եմ հայտնում մեր հայրենիքի պաշտպանության համար իրենց թանկագին կյանքը նվիրած զինվորականությանը, աշխարհազորայիններին և ուզում եմ շնորհակալություն հայտնել նաև այն լեգենդար բանակին, որը անձնուրացորեն 43 օր պատերազմեց գրեթե դաշնակցից զուրկ վիճակում աշխարհի ամենաոխակալ ժողովուրդների ծնած պետականությունների դեմ՝ Թուրքիա, Ադրբեջան։ ՀՀ ԶՈՒ-երի 43 օրվա մարտերը, անկախ դավաճանության ու դասալքման դեպքերի վերաբերյալ տարածվող լուրերից, գրանցեցին աննախադեպ հերոսականության, անձնուրացության փայլուն էջ»։
