Ադրբեջանական Vesti.az-ի փոխանցմամբ՝ ՆԱՏՕ-ում Ռուսաստանի մշտական ներկայացուցիչ Դմիտրի Ռոգոզինը, որը օրեր առաջ հակահրթիռային պաշտպանության հարցով գտնվում էր Անկարայում, մեկնաբանել է ԱՄՆ Սենատի ընդունած վրացական բանաձևը, որում Մոսկվան մեղադրվում է Աբխազիան ու Հարավային Օսիան օկուպացնելու մեջ.
«Այդպիսի բանաձևի ընդունմամբ նրանք փորձում են լուծել իրենց նախընտրական խնդիրները։ Դրա համար էլ նրանք, ովքեր իրականում տեղյակ են ամերիկյան խոհանոցից, կարող են հաստատել, որ այդ բանաձևի ընդունումը կապված է ԱՄՆ-ում վրացական համայնքի աջակցությունը ստանալու հետ։ Ռուսական համայնքը վիթխարի է, սակայն այն ազդեցություն չունի։
Վստահ եմ, որ ամերիկացի սենատորները թքած ունեն Աբխազիայի, Հարավային Օսիայի և Վրաստանի վրա, ինչ-որ իմաստով՝ նաև Ռուսաստանի վրա։ Այդօրինակ որոշում ընդունելով՝ նրանք միայն փորձում են դուր գալ ամերիկացի ընտրողին։
Զուր չէ, որ Վրաստանում լուրջ նախագիծ է մշակվել։ Զուր չէ, որ ամերիկյան Կենտրոնական հետախուզական վարչությունը (ԿՀՎ) իր դերն է ունեցել Սաակաշվիլիի և նրա ապագա կնոջ ծանոթության հարցում։ Նրա կինը վրացուհի չէ (հոլանդուհի է) և եկել է եվրոպական երկրներից մեկից։
Մենք չենք կարող ամեն ինչ պատմել, սակայն, դժբախտաբար, երբեմն ստիպված ենք լինում կարդալ ու բացահայտել տարբեր եղանակներով, և մեզ ցնցում է այդպիսի որոշման ընդունման ժամանակ ցուցաբերված ցինիզմը»:
Հիշեցնենք, որ ավելի վաղ Ռոգոզինն ԱՄՆ Սենատի կողմից վրացական բանաձևի ընդունումը պայմանավորել էր Մոսկվայի ու Վաշինգթոնի միջև «վերաբեռնման» քաղաքականության վարկաբեկման փորձով։
Ինչ վերաբերում է Սաակաշվիլիի կնոջը, ապա հոլանդուհի իրավաբան Ռուլովսը Վրաստանի ներկայիս նախագահ Միխեիլ Սաակաշվիլիի հետ ծանոթացել է 1993 թվականին Ստրասբուրգում, իսկ վրացական քաղաքացիություն է ստացել 2008 թվականի հունվարին:
