Պեկինի քաղաքապետ Գո Ցզինլունի հրավերով հուլիսի 26-30-ը պաշտոնական այցով ՉԺՀ մայրաքաղաքում էր գտնվում Երևանի քաղաքապետ Կարեն Կարապետյանի գլխավորած պատվիրակությունը: Պեկինի և Երևանի միջև երկկողմ հարաբերություններ հաստատելու և քաղաքային կառավարման ոլորտում գործակցության հիմքեր ստեղծելու առումով` առաջին պաշտոնական այցը հագեցած էր բազմակողմ հանդիպումներով:
Հուլիսի 29–ին Կարեն Կարապետյանի և Պեկինի քաղաքապետ Գո Ցզինլունի պաշտոնական հանդիպման ընթացքում կողմերը կարևորել են երկու մայրաքաղաքների միջև հարաբերությունների աշխուժացման և ընդլայնման անհրաժեշտությունը։ Կարեն Կարապետյանն ընդգծել է, որ Երևանը շահագրգռված է ու բաց մայրաքաղաքի զարգացմանն ուղղված կառուցողական առաջարկությունների քննարկման համար։ Իր գործընկերոջը ներկայացնելով Երևանի զարգացման հեռանկարներն ու իրականացվող ծրագրերը, Կարեն Կարապետյանը չինական կողմին առաջարկել է մասնակցություն ունենալ փոխադարձ հետաքրքրություն ներկայացնող ներդրումային ծրագրերում, նշելով, որ Երևանը պատրաստ է Պեկինի գործարար շրջանակներին ներկայացնել ներդրումային մի շարք առաջարկներ, ինչպես նաև կազմակերպել չին գործարարների այցը Երևան։ Երևանի քաղաքապետը նշել է նաև, որ չինական կապիտալը հետամուտ է իրականացնել երկարաժամկետ և երաշխավորված ներդրումային ծրագրեր, որոնց համար Երևանն այսօր բարենպաստ պայմաններ է ապահովում: Բացի այդ, գործունեություն ծավալելով Երևանում, չին գործարարները հնարավորություն կունենան մասնակցություն ունենալ նաև տարածաշրջանի շուկաներում։
Երևանի քաղաքապետը չին գորընկերոջն առաջարկել է դիտարկել Երևանում Պեկինի և Պեկինում Երևանի տներ հիմնելու հնարավորությունները։
Գո Ցզինլուն իր հերթին պատրաստակամություն է հայտնել ըստ ամենայնի օժանդակել երկու մայրաքաղաքների միջև գործակցային հարաբերությունների ընդլայնմանն ու խորացմանը և սիրով ընդունել է պաշտոնական այցով Երևան այցելելու Երևանի քաղաքապետ Կարեն Կարապետյանի հրավերը։
Հանդիպման ավարտին կողմերը հուշագիր են ստորագրել Երևանի և Պեկինի քաղաքապետարանների միջև համագործակցության վերաբերյալ.
«Պեկինի քաղաքապետի հետ ստորագրած համաձայնագիրը երկու մայրաքաղաքների միջև շարունակական հարաբերությունների սկիզբ է դնում։ Իմ գործընկերոջը հրավիրել եմ աշխատանքային փոխադարձ այցով գալ Երևան, իսկ մինչ այդ, պայմանավորվածության համաձայն, աշխատանքային խումբ կստեղծվի։ Շատ ենք կարևորում Պեկինի հետ մեր հարաբերությունները և, հաշվի առնելով Չինաստանի զարգացումներն ու ներդրումային հնարավորությունները, կարծում եմ, որ գործակցության ընդհանուր եզրեր կգտնենք։ Ընդհանուր առմամբ հանդիպումը դրական և հեռանկարային եմ գնահատում»,- նշել է Կարեն Կարապետյանը։
Այցի շրջանակում Երևանի քաղաքապետը հանդիպում է ունեցել նաև ինովացիոն և հեռահաղորդակցության տեխնոլոգիաների ոլորտի աշխարհում հայտնի առաջատար ընկերություններից մեկի՝ «Հուայվեյ տեքնոլոջիե ընկերության նախագահի հետ։ Քննարկվել են Երևանում «Հուայվեյ թեքնոլոջի» –ի կենտրոն հիմնելու , ինչպես նաև ոլորտում հնարավոր համագործակցությանն առնչվող հարցեր։ Ստորագրվել է համագործակցության հուշագիր` ոլորտում համատեղ աշխատանքներ իրականացնելու նպատակով:
Ավտոբուս արտադրող չինական խոշորագույն ընկերություններից մեկի ղեկավարության հետ պատվիրակությունը քննարկել է վարկային միջոցներով շուրջ 400 ավտոբուսների Երևան ներկրմանն առնչվող հարցեր։
Այցի ընթացքում Երևանի պատվիրակությունը աշխատանքային հանդիպում է ունեցել Պեկինի տրանսպորտի կոմիտեում, ծանոթացել ոլոտում տարվող քաղաքականությանը, Պեկինի տրանսպորտի կառավարման սկզբունքներին ու մոտեցումներին։ Հայկական կողմը, ներկայացնելով Երևանում տրանսպորտի ոլորտում իրականացվող բարեփոխումների ընթքացքն ու ներդրումային հնարավորությունները, չին գործընկերներին առաջարկել է մասնակցել ներդրումային ծրագրերին։ Չինական կողմն իր պատրաստակամություն է հայտնել ուսումնասիրել առաջարկությունները և անհրաժեշտության դեպքում աջակցել փորձի փոխանակման առումով։
Պեկինի գործարարության կոմիտեում աշխատանքային հանդիպման ժամանակ, որին մասնակցել են Պեկինի ինչպես պետական, այնպես էլ մասնավոր տարբեր ընկերությունների ներկայացուցիչներ, ներկայացվել է Երևանում նախատեսվող ներդրումային 6 խոշոր ծրագիր։ Նշելով իրենց հետաքրքրվածությունը՝ չինական կողմը խոստացել է ուսումնասիրել ծրագրերն ու կարճ ժամկետում արձագանքել։
Հայկական պատվիրակությունը աշխատանքային հանդիպում է ունեցել նաև կանաչապատման և արտաքին ձևավորման կոմիտեներում , ուր քննարկվել են երկկողմ գործակցությանն ու ինչպես ներդրումային, այնպես էլ համատեղ ծրագրերի իրականացմանն առնչվող հարցեր։
Պեկինի քաղաքաշինության թանգարանում Երևանի պատվիրակությունը հնարավորություն է ունեցել ծանոթանալ Չինաստանի մայրաքաղաքի քաղաքաշինության պատմությանն ու արդի նվաճումներին։
Այցի ընթացքում Երևանի պատվիրակությունը եղել է նաև Պեկինի զբոսաշրջային կենտրոնում, ծանոթացել ոլորտի ուղղություններին ու ժամանակակից պահանջներին:
