ԱՄՆ փոխնախագահ Ջոզեֆ Բայդենը վարձակալությամբ տարածք է հանձնել իր անվտանգության ծառայության ներկայացուցիչներին: Այս մասին հաղորդում է The Washington Post-ը: Թերթի տեղեկություններով՝ Բայդենը Դելավեր նահանգում ունի փոքրիկ քոթեջ, որը հանձնել է վարձակալության մինչև 2013 թ. աշունը: Հատուկ ծառայությանն այդ բնակարանն արժենում է ամսական 2,200 դոլար: The Washington Post-ի հոդվածագիրը նշում է, որ, փաստորեն, ԱՄՆ փոխնախագահն իր անվտանգության ծառայության շնորհիվ կաշխատի լրացուցիչ 66 հազար դոլար:
Հատուկ ծառայությունում նշել են, որ այդ վարձակալությունն ունի գործնական բնույթ: Այն շատ մոտ է Բայդենի տանը, ինչը թույլ է տալիս ավելի արդյունավետ իրականացնել Բայդենի անվտանգության ապահովումը: Նշվում է, որ այս տունը պատկանել է Բայդենի մորը, որ մահացել է 2010 թ.: Դրանից հետ Բայդենն առաջարկել է այն իր անվտանգության ներկայացուցիչներին, որոնք սկզբում հրաժարվել են, ապա մեկ տարի անց այն վարձակալել են:
Ամերիկյան մամուլում այս հարցը քննարկվում է: Այն հատկապես արդիական է, քանի որ քաղաքական գործիչները որոշում են պետական ծախսերի կրճատման հարցը, իսկ այս քայլը, փաստորեն, ոչ մի կերպ չի տեղավորվում բյուջետային ծախսերի կրճատմանն ուղղված ամերիկյան վարչակազմի քաղաքականության մեջ: