Երեկ, կարելի է ասել հանրային ճնշման ներքո, քարտեզի ձևով հրապարակվեց սահմանային իրավիճակը։ Մինչ այդ, շատ կարծիքներ էին հնչում, որ հանրությունը պարտավոր է իմանալ իրավիճակը, հստակ պատկերացում ունենա ով որ հատվածում ինչպիսի դիրքային առավելություն կամ զիջումներ ունի։ Քարտեզը հրապարակվեց, որից պարզ դարձավ, որ Թալիշի հատվածն է հակառակորդի տիրապետության տակ, ինչպես նաև որոշակի հատվածներ հարավից։
Պաշտպանության նախկին փոխնախարար, գեներալ, այժմ առաջնագծում գտնվող Գագիկ Մելքոնյանն «Առաջին լրատվական»-ի հետ զրույցում ասաց, որ հնարավորություն չի ունեցել քարտեզը տեսնել, սակայն ինքը կատեգորիկ դեմ է պատերազմական իրավիճակում նման քարտեզներ հրապարակելուն, ինչպես նաև զոհերի անունները հրապարակելուն. «Ես կատեգորիկ դեմ եմ, որ համ քարտեզ ցույց տան, համ զոհվածների անուններ հրապարակեն։ Մենակ ես չէ, շատ զինվորականներ են դրան դեմ։ Չի կարելի։ Ում ենք ինչ որ բան ապացուցում։ Թուրքի՞ն ենք ասում տես ինչ հաջողություններ ունես։ Չի կարելի։ Պատերազմը երբ որ կավարտվի, թող նոր ցույց տան՝ համ քարտեզներ, համ զոհերի ցուցակները»,-ասաց Մելքոնյանը։
Մեր դիտարկմանը՝ որ հակառակ տեսակետ կա, որ հանրությունը իրավունք ունի իմանալու ինչ է կատարվում առաջնագծում, մեր զրուցակիցը հակադարձեց. «Սա պատերազմ է, հանրությունը պատերազմի թեժ օրերին ամեն բան չէ, որ պետք է իմանա։ Պատերազմի ժամանակ ամեն պահի իրավիճակ է փոխվում։ Ամեն րոպե ասելո՞ւ ենք վայ, հակառակորդը առաջ է եկել, մեկ էլ թե ուռա, նահանջել են։ Սա լուրջ չէ։ Թող պատերազմն ավարտվի բոլորն ամեն ինչ կիմանան։ Իսկ եթե ինչ-որ տեղ էլ առաջ են եկել, մեր խնդիրն է նրանց հետ շպրտել ու վերականգնել նախկին իրավիճակը»,-ասաց գեներալը՝ հավելելով, որ այն հատվածում որտեղ ինքն է՝ ամեն ինչ նորմալ է, ոչ մի առաջխաղացում չկա, տղաների դուխն էլ տեղն է։ «Լյուբոյ ժամանակ էլ, եթե պետք լինի, հրամանաի դեպքում դրանց քիթ-մռութները կջարդենք»,-ասաց Մելքոնյանը։
Գեներալի խոսքով Ալիևն արդեն երկու օր է պատերազմն ավարտելու և բանակցությունների սեղանի շուրջ նստելու մասին է խոսում, ինչը նշանակում է, որ իրենք զգում են, որ իրենց քիթ-մռութների ջարդելու մոտալուտ վտանգը։ Դրա համար էլ արդեն պատերազմն ավարտելու մասին են խոսում։
