«Հիմա» երիտասարդական նախաձեռնության անդամները հանդես են եկել ռուսական միգրացիոն գրասենյակները փակելու պահանջով։ «Առաջին լրատվական»-ի հետ զրույցում նախաձեռնության անդամ Անահիտ Սարգսյանն ասաց, որ խնդրի հիմքը հայաստանյան իշխանությունների վարած քաղաքականությունն է։
«Մեր խնդիրն առաջին հերթին այդ միգրացիոն գրասենյակների անօրինական գործունեությունը ու դրանց բացասական հետևանքները կասեցնելն է։ Ռուսաստանը, ելնելով իր երկրի շահերից, կարող է այդ գործողություններն իրեն թույլ տալ, սակայն մենք չպիտի թույլ տանք, որ այդ ամենն անի Հայաստանում»,- ասաց Ա. Սարգսյանը։
Նրա խոսքով ռուսական միգրացիոն գրասենյակները Հայաստանի տարածքում գործում են անօրինականորեն, քանի որ դրանք գրանցված չեն արտաքին գործերի և արդարարդատության նախարարություններում։
«Դրանք ոչ միայն մեծ վնաս են տալիս մեր երկրի դեմոգրաֆիային, այլև անօրինական են։ Իսկ այն, ինչ անօրինական է, պետք է փակվի»,- նշեց նախաձեռնության անդամը՝ շեշտելով, որ խնդիրը մեր երկրի վարած քաղաքականությունն է, քանի որ այդ գրասենյակները կարող էին տասնյակ տարիներ գործել այստեղ, բայց շատ քիչ թվով մարդիկ հեռանային։
«Պետք է հասկանալ, որ այդ գրասենյակները շատ լավ կյանք չեն խոստանում նրանց, ովքեր հեռանում են երկրից։ Նրանք գնում են ռուսական ծայրամասեր, որտեղ կյանքի պայմաններն իդեալական չեն»,- ավելացրեց նա՝ հավելելով, որ մեր երկրում սոցիալական վիճակն այնքան վատ է, մարդիկ այնքան ճնշված են զգում իրենց, որ հեռանում են Ռուսաստանի ինչ-որ ծայրամաս։
«Ռուսաստանն այն երկիրը չէ, որ շատ բարյացակամ է տրամադրված կովկասցիների ու մասնավորապես հայերի հանդեպ, և միևնույն է, այդ ամենը հաշվի առնելով, մարդիկ լքում են երկիրը»,- խոսքը եզրափակեց Ա. Սարգսյանը։