Եվրախորհրդարանում Հունաստանի պատգամավոր Եվա Կաիլին Եվրամիությանը դիմում է ներկայացրել՝ դիվանագիտական անձնագրերով ադրբեջանցիների համար շենգենյան վիզան չեղարկելու, իսկ Ադրբեջանի քաղաքացիների համար վիզային ռեժիմ սահմանելու վերաբերյալ:
Եվրախորհրդարանի պատգամավորը նշում է, որ դա պետք է լինի Թուրքիայից բացահայտ աջակցություն ստացող Իլհամ Ալիևի ավտորիտար ռեժիմի կողմից Արցախի հայ քաղաքացիների մարդու իրավունքների բացահայտ ոտնահարման հետևանք, հաղորդում է Greek City Times կայքը:
Միևնույն ժամանակ, նա կոչ է արել գնահատել ԵՄ անվտանգությունը`հաշվի առնելով Արցախ ներխուժելու Ադրբեջանի փորձը և հակամարտության գոտուց դեպի ԵՄ անօրինական միգրացիոն հոսքերի ավելացման ակնհայտ հնարավորությունը:
Նա հանձնաժողովից ամբողջական զեկույց և տեղեկատվություն է պահանջել Եվրախորհրդարանի համար:
Կաիլին նաև կոչ է արել գործնական աջակցություն ցուցաբերել Հայաստանին՝ երկխոսություն սկսելով ՀՀ քաղաքացիների մուտքի վիզաների չեղարկման վերաբերյալ, հաշվի առնելով, որ երկիրը գտնվում է Թուրքիայի կողմից աջակցվող զանգվածային ռազմական հարձակման սպառնալիքի տակ:
«Պարոն Ալիևը սրբապիղծ պատերազմ է մղում հայերի դեմ Լեռնային Ղարաբաղում ՝ խախտելով 1994 թ. հրադադարի մասին համաձայնագիրը և անտեսելով միջազգային հանրության երկխոսության կոչերը: ԵՄ-ն պետք է վճռականորեն ցույց տա, որ մեր հարևանությամբ նման բացահայտ ռազմական հարձակումները չեն կարող մնալ առանց գործնական հետևանքների »,- ասել է Եվրախորհրդարանում Փոփոխության համար շարժման պատգամավորը:
Κατέθεσα αίτημα @EU_Commission αφαίρεσης ΕU #Visa Αζέρων με διπλωματικό διαβατήριο & κατάργησης της διευκόλυνσης απόκτησης ΕU Visa-συνέπεια της κατάφωρης παραβίασης ανθρωπίνων δικαιωμάτων των Αρμενίων #ΝαγκόρνοΚαραμπάχ από #Αζερμπαϊτζάν #Τουρκία &ζήτησα ενημέρωση του @Europarl_EN pic.twitter.com/DSvAi61GYc
— Eva Kaili (@EvaKaili) October 19, 2020
