Թուրքական Sabah թերթի փոխանցմամբ՝ Թուրքիայի նախագահ Աբդուլլահ Գյուլը Ստամբուլ մեկնելուց առաջ Անկարայի «Էսենբողա» օդանավակայանում պատասխանել է լրագրողների հարցերին՝ անդրադառնալով բարձրագույն զինվորական հրամանատարության հրաժարականներին.
«Մենք հարգում ենք Գլխավոր շտաբի (նախկին) պետ Ըշըք Քոշաներին։ Մենք ցանկանում ենք, որ նա շարունակի իր աշխատանքը, սակայն, միևնույն ժամանակ, հարգանքով ենք մոտենում նրա կայացրած որոշմանը։ Մյուս հրամանատարները նույնպես հասել են թոշակի գնալու տարիքին։
Երկրում իրադարձությունները զարգանում են իրենց հունով։ Մենք ապրում ենք իրավական պետությունում, իշխանությունները տարանջատված են, դատավորներն անկախ որոշումներ են ընդունում։ Այդ պատճառով էլ մենք ոչինչ չենք կարող անել։ Բարձրագույն ռազմական խորհուրդը (YAŞ ) կշարունակի իր աշխատանքն օրենքի շրջանակներում։ Այն կսկսեն ղեկավարել նոր հրամանատարներ։ Վարչապետը նույնպես կմասնակցի այդ նիստին։ Ոչ մի խնդիր չկա, ճգնաժամ չկա։ Պարզապես այդ օրն արտակարգ իրավիճակ էր, մինչդեռ այժմ իրադարձությունները զարգանում են իրենց հունով»։
Հիշեցնենք, որ Թուրքիայի Սահմանադրության 117-րդ հոդվածի համաձայն՝ Գլխավոր շտաբի պետին, նախարարների խորհրդի առաջարկով, նշանակում է երկրի նախագահը: Իր պարտականությունների ու լիազորությունների իրականացման ժամանակ նա պատասխանատու է երկրի վարչապետին:
