Վաղը Լոռու մարզի Ուռուտ գյուղում տեղի են ունենալու համայնքի ղեկավարի ընտրություններ: Հատկանշական է այն հանգամանքը, որ այս ընտրապայքարում ՀՀԿ-ականներ ու ԲՀԿ-ականներ չկան: Գյուղապետի պաշտոնի համար ընտրապայքարի են դուրս եկել Կոմունիստական կուսակցության ներկայացուցիչ, գործող գյուղապետ Սերգո Ջուլհակյանը և ՕԵԿ-ական Հովհաննես Պետրոսյանը: Ավելին՝ մրցակիցները ժամանակին համադասարանցիներ են եղել, իսկ այսօր արդեն գյուղապետի պաշտոնի համար պայքարում են մեկը մյուսի դեմ:
Ուռուտ վարչական շրջանը գտնվում է Ուռուտ գետի ափին, որը պատված է եղել ուռենիներով, ինչով էլ պայմանավորված է գյուղի և գետի անվանումը: Գյուղը հիմնվել է 19-րդ դարի սկզբին: Ուռուտը փռված է «Մեծ քար» կոչվող սարի լանջին՝ 2 կմ երկարությամբ: Գյուղի արևելյան մասում է գտնվում եկեղեցին, իսկ հարավարևմտյան մասում՝ «Սուրբ Սարգիս» մատուռը: Այստեղ հաճախակի են անձրևոտ, կարկտային և երաշտի տարիները, որից շատ է տուժում գյուղատնտեսությամբ զբաղվող գյուղացին: Ոռոգման ջուր չունենալու պատճառով համայնքը դժվարանում է կազմակերպել գյուղմթերքների արտադրությունը: Հիմնականում զբաղվում են ցորենի, գարու, առվույտի, կարտոֆիլի, կաղամբի և բանջարա-բոստանային այլ մշակաբույսերի արտադրությամբ, որը մեծապես կախված է բնության քմահաճույքից: Անձրևային տարիներին որոշ չափով դեռ կարելի է բերք հավաքել, իսկ երաշտի տարիներին գյուղացին կորցնում է բերքի 70%-ը: Հետևաբար, ինչպես տեղեկացանք գործող գյուղապետից, զբաղվում են հիմնականում անասնապահությամբ:
Գյուղը տարիներ շարունակ ղեկավարում է կոմունիստ գյուղապետ Սերգո Ջուլհակյանը, ով 3 անգամ առաջադրել է իր թեկնածությունը և հաղթել: Նա մեզ հետ զրույցում նշեց, որ թեև 3 անգամ շարունակ իր հետ ընտրապայքարի են դուրս եկել իշխող կուսակցության ներկայացուցիչները, սակայն նա առանց ընտրապայքար ծավալելու հաղթել է: Ստացվում է, որ մարդկանց մեջ դեռ կարոտ կա կոմունիզմի նկատմամբ: Գյուղապետը նշեց, որ մեր զրույցի պահին գյուղում չի գտնվում, գնացել է խոտհնձի: Հարցին, թե դժվար չէ՞ կոմունիստ լինելով հանդերձ աշխատել իշխանական կուսակցությունների հետ՝ պատասխանեց. «Մոտ 100 անգամ ՀՀԿ-ից հանրապետական դառնալու առաջարկություն եմ ստացել, սակայն հրաժարվել եմ, քանի որ ի սկզբանե կոմունիստ եմ եղել»: Մեր այն դիտարկմանը, թե այս անգամ ՕԵԿ-ական է խաղի մեջ մտել, ում 2008թ.-ից հետո իր թևի տակ է առել Սերժ Սարգսյանը, հետևաբար մտավախություն չունի՞, որ նա կհաղթի՝ ավելացրեց. «Հաղթում է, թող հաղթի: Այստեղ ժողովուրդն է որոշում, սա ուժի հարց չէ, որ ես նրա հետ մրցեմ, հաղթեմ կամ պարտվեմ: Սա հեշտ աշխատանք չէ, որ կողքից երևում է: Մանավանդ, որ գյուղացու ձեռքին փող չկա, հոգսերը, հարկերը գլուխ են բարձրացրել: Էսօր էլ, որ ձեռքները փող չկա, անընդհատ քարկոծումների մեջ եմ: Ինչ ճիշտն ա ճիշտ ա, ես թեկնածությունս չէի դնում,- 90 հազար դրամի համար ամեն օր թուք ու մուր եմ ուտում,- սակայն մարզպետը զանգեց ասաց, որ թեկնածությունս հեթական անգամ դնեմ: Բայց նախընտրական պայքարին ոչ խառնվել եմ, ոչ էլ խառնվելու եմ»,- անկեղծացավ գյուղապետը:
Այնինչ, ինչպես տեղեկացանք, ՕԵԿ-ական թեկնածուն՝ օղու շիշը թևի տակ դրած, տնետուն է շրջում՝ իր օգտին ձայներ հավաքելու խնդրանքով: Միաժամանակ խոստանում է, որ գումար էլ կտա: Այս խոսակցությունները գյուղապետի ականջին էլ են հասել: Այդ կապակցությամբ ասաց՝ տալիս է, թող տա, պատճառաբանելով, որ գյուղացիների ձեռքին փող չկա: Այդ գումարները Հովհաննես Պողոսյանը, հարկավ, իր գրպանից չի տալու, այլ ՕԵԿ-ն է այս հարցում օգնելու, քանի որ գյուղապետը ունի-չունի՝ ընդամենը գլխի վերևում մի ծածկ և երկու կով ունի: Ինչպես տեղեկացանք Լոռու մարզի ընտրական հանձնաժողովից, թեկնածուն նույնիսկ անձնական հեռախոսահամար չունի: Էլ չենք խոսում մեքենայի և մեծ տնտեսության մասին: Դե իսկ գործող գյուղապետը նշեց, որ ինքը ե՛ւ մեծ տնտեսություն ունի, ե՛ւ լավ շրջապատ ու ընկերներ: Ավելին՝ ինքը այդ 90 հազար դրամի հույսին չէ, և եթե միայն իր տնտեսությամբ ու անասուններով զբաղվի, ըստ պահանջի կապրի: «Կամ՝ գնում է սրա-նրա տուն, ասում, թե իմ դասընկերն է եղել, միասին ենք սովորել: Մեր գյուղի բնակիչները այնպիսին են, որ ասում են՝ հա, քեզ կընտրեմ, բայց իրենք գիտեն, թե ով ոնց ու ինչ է ու ըստ այդմ իրենց ընտրությունը կատարում են: Ուզում եմ ասել՝ իրենք իրենց անելիքը գիտեն: Ժամանակ է եղել, որ 6 թեկնածու ինձ հետ դուրս են եկել ընտրապայքարի՝ անկուսակցական, ՀՀԿ-ական, ԲՀԿ-ական, բայց ես եմ ընտրվել»,- ինքնավստահ հայտարարեց գյուղապետը:
Ստացվում է, որ ՕԵԿ-ական թեկնածուն իր գյուղապետ դասարանցու՝ ներկա մրցակցի անունը այստեղ-այնտեղ շահարկելով փորձում է իր օգտին ձայն հավաքել: Ի դեպ, մինչև ՕԵԿ-ական դառնալը, նա դիմել է ԲՀԿ-ին՝ ընտրություններում իրեն հովանավորելու համար, սակայն ԲՀԿ-ում մերժել են՝ պատճառաբանելով, որ նրա հնարավորություններին ծանոթ են և վստահ են, որ գյուղապետի չի ձգի, այնինչ գործողը հարգված մարդ է և առանց գումարի կարողանում է իր վերարտադրությունն ապահովել: Բայց երբ թակել է ՕԵԿ դուռը, այն բացվել է իր առաջ:
Ինչևէ, գործող գյուղապետը առկա խնդիրների մասին խոսելիս նշեց, որ մասամբ ջրի խնդիր կա, որի լուծումն ընթացքի մեջ է: Գյուղը ասֆալտապատված է, ապահովված է գազով: Բայց գերխնդիրն այն է, որ բնակիչները արտագաղթում են: Նրա խոսքերով, 300 մարդ ներկա պահին բացակայում են գյուղից՝ օրվա ապրուստը վաստակելու նպատակով: Եթե այսպես շարունակվի, հաջորդ ընտրություններին գյուղապետի պաշտոնը ժառանգաբար կփոխանցվի կամ էլ գյուղը որպես այդպիսին կվերանա: