Բարձրագույն դատական խորհուրդն երեկ նիստ էր հրավիրել, որի ժամանակ տեղի է ունեցել Վճռաբեկ դատարանի նախագահի, ինչպես նաև նույն դատարանի դատավորների թափուր տեղի համար առաջադրված թեկնածուների ընտրության հարցը։ Տեղի է ունեցել նաև ընտրություն։ Վճռաբեկ դատարանի նախագահի թեկնածուի համար առաջադրվել էր 3 թեկնածու՝ Վճռաբեկ դատարանի դատավորներ Լիլիթ Թադևոսյանը, Ռուզաննա Հակոբյանը և Մամիկոն Դրմեյանը։ ԲԴԽ-ն փակ, գաղտնի քվեարկությամբ ՀՀ վճռաբեկ դատարանի նախագահի թեկնածու է ընտրել ՀՀ վճռաբեկ դատարանի քրեական պալատի նախագահ Լիլիթ Թադևոսյանին:
Լիլիթ Թադևոսյանը, հիշեցնենք, նախկին դատախազ Զելիմ Թադևոսյանի դուստրն է, որը հանդիսացել է 2008 թվականի «Մարտի 1»-ի մի շարք գործերով մեղադրող դատախազը։ Լիլիթ Թադևոսյանն ինքը 2008-ին եղել է «7-ի գործով» դատախազների կազմում։ Նա 2018-ի հուլիսից Վճռաբեկ դատարանի քրեական պալատի նախագահն է։
Նշենք, որ Վճռաբեկ դատարանի նախագահին ընտրում է Ազգային ժողովը՝ պատգամավորների ձայների մեծամասնությամբ։ Բարձրագույն դատական խորհուրդն արդեն իսկ տեղեկացրել է, որ Վճռաբեկ դատարանի նախագահի թեկնածուի վերաբերյալ համապատասխան փաստաթղթերն օրենքով սահմանված կարգով և ժամկետներում կներկայացնի Ազգային ժողով: Վճռաբեկ դատարանի նախագահի ընտրության վերջնաժամկետը հոկտեմբերի 18-ն է։
Հիշեցնենք, որ Վճռաբեկ դատարանի նախագահ կարող են դառնալ բոլոր այն դատավորները, որոնք տվյալ դատարանում ունեն ոչ պակաս, քան երեք տարվա դատավորի փորձառություն, չունեն կարգապահական տույժ, չեն պաշտոնավարել Վճռաբեկ դատարանի նախագահի պաշտոնում և Բարձրագույն դատական խորհրդի անդամ չեն։
Փաստաբան Ալեքսանդր Սիրունյանը «Առաջին լրատվական»-ի հետ զրույցում ասաց, որ Լիլիթ Թադևոսյանի ընտրությանը շատ լավ է վերաբերում, նրան ճանաչում է 25 և ավելի տարի, բարձր մակարդակի իրավաբան է, լավ մարդ, բայց ափսոսում է, որ նա ընտրվելու է մի մարմնի ղեկավար, որը Հայաստանին պետք չի։ «Վճռաբեկ դատարանը պետք է վերացվի։ Դա անպիտան մարմին է։ Պետք է ի վերջո ստեղծվի գերագույն դատարան։ Այն տեսքով, որով հիմա կա Վճռաբեկ դատարանը, չպետք է գոյություն ունենա: Վճռաբեկ դատարանը ամենավարկաբեկված մարմիններից մեկն է Հայաստանում։ Այդ կառույցում ուզում ես նախագահ փոխի, ուզում ես անդամ փոխի, բան չի փոխվի։ Այդ կառույցը պետք է քանդել ու նորից հավաքել, որի լավագույն լուծումն էլ Սահմանադրական դատարանի ու Վճռաբեկի միացումն է։ Իսկ ներկա վիճակով որևէ փոփոխություն ես չեմ ակնկալում։ Այն, ինչ արել է Վճռաբեկը վերջին 20 տարվա ընթացքում, հնարավոր չէ ուղղել, շտկել։ Վճռաբեկը արդարադատության մեջ արել է հնարավոր ամենավատը, որ կարելի էր պատկերացնել։ Հետևաբար՝ կրկնում եմ, որ այդ կառույցը ներկա տեսքով չպետք է գոյություն ունենա։ Այնպես որ, Լիլիթ Թադևոսյանի թեկնածության ընտրությանը շատ լավ եմ վերաբերում։ Նրա մասնագիտական որակները շատ բարձր են, բայց կրկնում եմ, շատ եմ ափսոսում, որ Լիլիթ Թադևոսյանը պետք է դառնա այդ մեռած մարմնի ղեկավարը»,- ասաց Սիրունյանը։
Այն, որ Վճռաբեկ դատարանը սպառել է իրեն, փաստում են փաստաբանների մեծ մասը։ Գևորգ Գյոզալյանն էլ վերջերս մեզ հետ զրույցում ասել էր, որ Վճռաբեկ դատարանի այն կազմը, որը տարիներով նստած է այդ դատարանում, նրանցից օր առաջ ազատվել է պետք, քանի որ Վճռաբեկ դատարանն ամեն օր բռնաբարել է մարդու իրավունքները։
Նշենք, որ երեկ ԲԴԽ նիստում նախատեսված էր նաև Վճռաբեկ դատարանի դատավորների, Քաղաքացիական պալատի դատավորի թափուր պաշտոնի համար թեկնածուների ընտրություն։ Այդ ընտրությունը ևս տեղի է ունեցել, և այդ թեկնածուն ևս կներկայացվի Ազգային ժողովին։ Վճռաբեկ դատարանի դատավորների համար անհրաժեշտ է պատգամավորների ձայների 3/5-ը։
