Ֆրանսիական «Հույսի շղթա» կազմակերպությունը բժշկական օգնություն է ցուցաբերել Լեռնային Ղարաբաղում պատերազմից տուժած բնակչությանը: Այս մասին ասված է կազմակերպության տարածած հաղորդագրությունում:
«Կիրակի, հոկտեմբերի 11-ին Փարիզից Երևան ժամանեց «Հույսի շղթայի» առաջին առաքելությունը՝ առաջին անհրաժեշտության բժշկական սարքավորումներ (էլեկտրական վիրահատական նշտարներ, շարժական վենտիլյատորներ), ինչպես նաև վեց հոգուց բաղկացած բժիշկների խումբ (կարդիոլոգ, օրթոպեդիստներ, վերականգնող վիրաբույժներ): Ըստ այս մարդասիրական առաքելության համակարգող, ֆրանսաբնակ սրտաբան վիրաբույժ Լևոն Խաչատրյանի, խումբը բաժանված է երկու մասի. առաջին մասը Երևանում կխնամի պատերազմական գոտուց բերված վիրավորներին, հատկապես երեխաներին, որոնք տուժել են ռմբակոծությունից և ստացել տարբեր տեսակի վնասվածքներ և այրվածքներ: Խմբի երկրորդ կեսը կմեկնի Ստեփանակերտ՝ տեղում գնահատելու վիճակը և հնարավորության սահմաններում խնամելու ադրբեջանական ռմբակոծություններից տուժած բնակիչներին»,- ասված է հաղորդագրությունում:
Կազմակերպությունը նշում է, որ կարիքի դեպքում առաջիկայում Հայաստան կժամանեն վիրաբույժների այլ խմբեր: «Հույսի շղթան» նախատեսում է ուղարկել նաև լրացուցիչ սարքավորումներ և դեղեր:
«Հույսի շղթա» բժշկական մարդասիրական ցանցը հիմնադրվել է 1994թ. և միջազգային մակարդակով կարևոր դեր է խաղում կարիքավոր երեխաների խնամքի և բուժման գործում աշխարհի երեք տասնյակ երկրներում: Ամեն տարի ավելի քան 200 հազար երեխա օգտվում է նրանց ծառայություններից, որոնցից 5800 վիրահատվում են:
