Մադագասկարի սահմանապահները ձերբակալել են երկու մաքսանենգների, որոնցից առգրավվել է 200 հազվագյուտ կրիա, այդ թվում՝ 26 մադագասկարյան կտցակուրծք կրիա, որոնք համարվում են երկրագնդի ամենախոցելի տեսակներից մեկը: Բնության մեջ դրանց թիվը չի գերազանցում 300-ը: Այս մասին հաղորդում է France Presse գործակալությունը:
National Geographic-ի տեղեկություններով, մաքսանենգները փորձել էին դուրս բերել նաև 169 ճառագայթային կրիաների: Դրանք հայտնաբերվել էին մաքսային զննության ժամանակ, երբ մաքսանենգներից մեկն արդեն օդանավում էր:
Տեղեկացնենք նաև, որ Մադագասկարն այս առումով ամենախոցելի երկրներից է, քանի որ կենդանիների տեսակներով հարուստ այս բնակավայրում հսկողությունը շատ ցածր մակարդակի վրա է, ինչի հետևանքով կղզուց արտահանված տեսակները հայտնվում են աշխարհի տարբեր մասերում: Կրիաները գնահատվում են զրահի և մսի համար, ինչպես նաև պահում են որպես տնային կենդանիներ:
