Դրամի կայունությունը պահպանվում է, խոշոր տատանումներ չկան, միայն բնական տատանումներ կան: Բանկերը կարողանում են այնքան ռեսուրս և հնարավորություն ունենալ, որ ճակատ մեկնած կամավորների և այն անձանց, որոնք աշխատել են և զորակոչվել են բանակ, վարկային պարտավորությունները հետաձգել, որոշ դեպքերում նախատեսվում է տոկոսների զեղչում: Այս մասին «Առաջին լրատվական»-ի հետ զրույցում ասաց իրավաբան, «Կոնվերս բանկի» խորհրդի նախագահ Արմեն Տեր-Տաճատյանը:
«Դեռևս մարտ-ապրիլին, կապված համավարակի հետ, մենք հասկացանք, որ ճգնաժամի հետ պետք է կարողանալ ապրել: Մենք պետք է հասկանանք, որ պատերազմական իրավիճակի մեջ ենք: Կարծում եմ՝ շատ էական է անվտանգության հայեցակարգը, այդ ամենը պետք է համակարգային ձևավորում ունենա: Ինչպես տեսնում եք՝ համակարգը աշխատում է և՛ Արցախում, և՛ Հայաստանում:
Համահայկական դրամահավաք է սկսվել, և քանի որ խնդիրը համամարդկային է, եթե ճիշտ գաղափարախոսություն առաջ քաշենք, վստահ եմ՝օտարներ էլ կմասնակցեն դրամահավաքին»,- նշեց Տեր-Տաճատյանը:
Նրա դիտարկմամբ՝ անհրաժեշտ է ունենալ ազգային անվտանգության հայեցակարգ, թե ինչպես ենք ապրելու հետագայում, և յուրաքանչյուր անձ իր անելիքը պետք է ունենա այդ ծրագրի իրականացման համար, այդ թվում կլինի նաև միջոցների հավաքագրում:
«Մենք հաղթում ենք, որովհետև ունենք պետություն, և պայքարում ենք մեր պետությունը, մեր տունը պահելու համար… Տնտեսական ռազմավարության խնդիր կա,- նշեց մերզրուցակիցը:- Մենք պետք է հաղթենք, ու դրա համար փող չպետք է խնայենք. տեխնոլոգիական զենքերի պատերազմների այս ժամանակաշրջանում բյուջեից հսկայական գումար պետք է նախատեսենք ՏՏ ոլորտի համար. դա պետք է լինի ազգային անվտանգության հայեցակարգի մեջ մտնող մշտական տարր»:
Մանրամասն՝ տեսանյութում:
