Արցախի Հանրապետության Ազգային ժողովը հայտարարություն է ընդունել, որով Հայաստանի, Ռուսաստանի և Իրանի իշխանություններին կոչ է արել ստեղծել համատեղ հակաահաբեկչական կոալիցիա՝ տարածաշրջան ներթափանցած ահաբեկիչներին և նրանց խմբավորումներին օպերատիվ և արդյունավետ կերպով ֆիզիկապես չեզոքացնելու համար:
«Առաջին լրատվական»-ի հետ զրույցում քաղաքագետ, «Հանուն հանրապետության դաշինք» կուսակցության ղեկավար մարմնի անդամ Ռուբեն Մեհրաբյանը կարծիք հայտնեց, որ Արցախի ԱԺ-ն ճիշտ ժամանակին և ճիշտ բովանդակությամբ ուղերձով է դիմել մեր և Ադրբեջանի հարևան երկրկներին. «Մի պարզ պատճառով, որ այն խաժամուժը, որի դեմ զինված պայքար է մղվում, պայքարը մղում են նաև ռուսները և իրանցիները, այսօր այդ խաժամուժը հայտնվել է Իրանի գլխավերևում և Ռուսաստանի փորատակում: Արցախի Ազգային ժողովի այդ կոչը իրատեսական է, ակնկալում ենք, որ այդ կոչը արձագանք կգտնի պաշտոնական Թեհրանի և Մոսկվայի կողմից»:
«Թուրքիան այսօր մարտահրավեր է նետել միջազգային անվտանգությանը, արտահանում է քաոս, արտահանում է սպառնալիքներ: Այս սպառնալիքը չի կարող չանհանգստացնել նաև Միացյալ նահանգներին, որի դե յուրե դաշնակիցն է Թուրքիան և ակնհայտորնե գործում է ԱՄՆ շահերին ընդդեմ: Այս հարցի շուրջ միջազգային հարաբերություններում ձևավորվել է կոնսենսուս»,- նշեց քաղաքագետը՝ մեծապես կարևորելով Մոսկվայի և Թեհրանի հետ հարաբերությունները, և վտանգների չեզոքացման առումով Միացյալ Նահանգների հետ ՀՀ իշխանության երկխոսություն սկսելը՝ հաշվի առնելով, որ քանի ԱՄՆ-ազդու լծակներ ունի ոչ միայն Թուրքիայի, այլ նաև Իսրայելի, Վրաստանի, Ուկրաինայի վրա:
«Հայաստանից մի ծանրակշիռ դիվանագետի այցը ԱՄՆ և այս հարցերը բարձրաստիճան պաշտոնյաների հետ քննարկելը և ելքեր գտնելը մեզ համար հրամայական է. խոսքը միջազգային սպառնալիքի մասին է»,- ընդգծեց քաղաքագետը:
Մանրամասն՝ տեսանյութում: