«Թալիբան» արմատական շարժումը հույս ունի, որ ԱՄՆ նախագահ Դոնալդ Թրամփը կվերընտրվի, և Աֆղանստանից դուրս կբերվեն ԱՄՆ զորքերը:
«Մենք հուսով ենք, որ (Թրամփը) կհաղթի ընտրություններում, և Աֆղանստանում ամերիկյան ռազմական ներկայությունը կավարտվի»,- հոկտեմբերի 11-ին CBS հեռուստաալիքին տված հարցազրույցում հայտնել Է թալիբների ներկայացուցիչ Զաբիհուլլա Մուջահիդը:
Թրամփի ընտրական շտաբի մամուլի քարտուղար Թիմ Մերթաուն գերադասել է զերծ մնալ նման աջակցությունից: «Թալիբանը» պետք է իմանա, որ նախագահը միշտ կպաշտպանի ամերիկյան շահերը ցանկացած միջոցներով»,- ասել է նա:
Արմատականների մեկ այլ ներկայացուցիչ նշել է, որ Թրամփը «շատ ավելի ազնիվ եղավ» շարժման հետ, քան իրենք ենթադրում Էին:
Ինչպես ավելի ուշ տեղեկացրել է Աֆղանստանի Tolonews հեռուստաալիքը, Մուջահիդն ինքը, մեկնաբանելով հրապարակումը, հետագայում հայտարարել է, թե CBS-ը սխալ է մեկնաբանել իր ասածները: Ավելի վաղ Սպիտակ տան ղեկավարը Fox Business հեռուստաընկերությանը տված հարցազրույցում հայտարարել է, որ ամերիկացի զինծառայողները կարող են Աֆղանստանից վերադառնալ մինչև տարեվերջ: Փետրվարի 29-ին Դոհայում ԱՄՆ-ը և «Թալիբանը» ստորագրել են հաշտության համաձայնագիր:
Ըստ համաձայնությունների՝ Միացյալ Նահանգները, նրա դաշնակիցները և կոալիցիան մտադիր են 14 ամսվա ընթացքում դուրս բերել բոլոր զորքերն Աֆղանստանից: Իրենց հերթին թալիբները երաշխավորում են, որ իրենց երկրի տարածքը չեն օգտագործի այնպիսի գործողությունների համար, որոնք սպառնալիք են ներկայացնում ԱՄՆ-ի և նրա դաշնակիցների համար:
