Հրադադարի տեքստում տարօրինակ բան կար. նախապես հայտարարվել էր, որ երկու երկրների արտգործնախարարները հրավիրվում են Մոսկվա՝ քննարկելու հումանիտար նպատակներով հրադադարի հարցը: Եվ հետո տեսնում ենք մի քանի կետից բաղկացած համաձայնագիր, (որը հատնի չէ ստորագրված է, թե անստորագիր), որի կետերից մեկը կարող է թվացյալ կապ ունենալ հրադադարի հետ, կարող է և կապ չունենալ: Հարց է առաջանում՝ եթե ժամկետ նշված չէ, թե երբ է ավարտվելու հրադադարը, դա վեր է ածվում զինադադարի՞: Այս մասին «Առաջին լրատվական»-ի հետ զրույցում ասաց Հանրային խորհրդի նախագահ Ստեփան Սաֆարյանը:
«Ադրբեջանն արդեն կլանվել է Թուրքիայի կողմից և Բաքուն Անկարայի դիկտատի տակ հայտարարում է, որ հրադադարն ուժի մեջ չէ, քանի որ չեն սահմանվել այդ հրադադարի կյանքի կոչման մեխանիզմները: Ենթադրում եմ՝ նրանց պայմանը հայկական ուժերի դուրսբերումն է»,- նշեց Սաֆարյանը:
Նրա կարծիքով՝ խնդրի լուծման երկու ուղղություն ունենք. «Երկուսն էլ շատ ցավոտ են և պրոբլեմատիկ, մեկը՝ շարունակել և կանգնեցնել Ադրբեջանին ու Թուրքիային, երկրորդ ուղղությունը դիվանագիտական ուղղություն է, ահռելի ջանքեր պետք է գործադրվեն՝ ստեղծված օրհասական վիճակը այս տարածաշրջանում շահեր ունեցող պետությունների սեղանին դնելու և հասկացնելու համար, որ այս գոյապահպանական իրավիճակում այլ հարց չկա, քան լուծել Ղարաբաղի կարգավիճակի հարցը»:
«Ռուսաստանին թվում էր, թե իրավիճակը իր կողմից վերահսկելի կլինի, բայց Թուրքիան հատել է կարմիր գծերը: Թուրքիան ավելի մեծ խնդիր է դրել, քան Ադրբեջանին օգնելը, նաև խնդիր է դրվել Ռուսաստանին կտրել Կովկասից՝ առավել ևս Հյուսիսային Կովկասի իսլամացման ֆոնին: Ռուսաստանը արդեն հասկանում է դա և անհանգստանում: Ռուսաստանը նաև հասկանում է, որ այս պրոցեսին երկար չմիջամտելը վնասում է իր հեղինակությանը:
Հրադադարի համաձայնությունը չպահպանելը կարող է ռուսական նախաձեռնության արտաքուստ տապալում լինել: Ռուսաստանի խաղաղապահ ուժերի տեղակայման անհագ ցանկությունը նորություն չէ: Եվ դա ինձ թույլ է տալիս վախով մտածելու, որ միգուցե հրադադարը չպահպանվեց, որպեսզի ռազմական գործողությունների վերաբռնկման տարբերակը լինի, և աշխարհը համոզվի, որ այլ տարբերակ չկար, քան խաղաղապահների տեղակայումը: Բայց առանց Մինսկի խմբի համաձայնության, դա չի լինի: Կոնֆլիկտը բարդ է, Ադրբեջանը կլանված է Թուրքիայի կողմից, իսկ Ռուսաստանը օբյեկտիվորեն չունի մեծ լծակներ քաղաքական ճանապարհով այս խնդիրը լուծելու: Սա էլ պետք է հաշվի առնենք: Ես վարկածներ եմ առաջ քաշում»,- նշեց Ս. Սաֆարյանը:
Մանրամասն՝ տեսանյութում:
